ముప్పది ఐదు సంవత్సరాల పరిపూర్ణ స్త్రీ లీల ఒంటిపైనున్న మెత్తని ఉన్ని శాలువను సున్నితంగా సవరించుకుంది. విమానం నిండా గంభీర నిశ్శబ్దం..మేఘాలను చీల్చుకుంటూ దూసుకుపోతున్న గర్జనవంటి మౌనధ్వని..గాత్రం ప్రవాహంలా సాగుతూంటే ఒక అంతర్లీనంగా వినిపించే ప్రాణప్రదమైన శృతివలె.
ఫస్ట్‌క్లాస్‌ కేబిన్‌లో..అతి సౌకర్యవంతంగా..ఏర్‌హోస్టెస్‌ల కన్నుసన్నలలో..ముప్పదిఆరువేల ఫీట్ల ఎత్తులో, గంటకు తొమ్మిదివందల కిలోమీటర్ల వేగంతో..,
అతివేగం..అతి అతిక్రమణ..అతి దూసుకుపోవడం..ఇవన్నీ ఎంత నిశ్శబ్దంగా, ఎంత నిశ్చలంగా,ఎంత గంభీరంగా ఎంత ఉత్సుకతతో నిండి ఉంటాయో…తన జీవితంలోవలె.
ఎదురుగా ఇరవైమూడు అంగుళాల ఎల్‌సీడీ కంప్యూటర్‌ కం టి.వి. తెరపై ‘దోహా’ అంతర్జాతీయ విమానాశ్రయానికి చేరువకాబోతున్న తమ విమానం ఏరియల్‌ వ్యూ కనబడ్తోంది..నాలుగ్గంటల క్రితం హైద్రాబాద్‌ ఏర్‌పోర్ట్‌లో ఐదు గంటలకు విమానంలోకి ఎక్కిన తర్వాత..బాంబే మీదుగా అరేబియా సముద్రం..సముద్రంపై వందల కిలోమీటర్ల ప్రయాణం..
మనిషి ఒదిగి ఒదిగి, వంగి వంగి, నంగి నంగి తలవంచుకుని నిలబడి ఉన్నంతసేపు ఈ ప్రపంచం నీపై స్వారీ చేస్తూనే ఉంటుంది. నీపై ఉక్కుపాదాన్ని మోపి తాడనం చేస్తూనే ఉంటుంది. ఒక్కసారి తల విదిలించి, నిక్కి నిలబడి ప్రశ్నించడం, ఎదురుతిరగడం, ఎదురొడ్డి నిలబడడం, బిగించిన పిడికిలితో సమాజంపై స్వారీ చేయడం మొదలెట్టిన తర్వాత..ప్రపంచం చిన్న బొచ్చు కుక్కపిల్లలా మనిషికి స్వాధీనమైపోవడం, లొంగిపోవడం, వెంట అతి వినమ్రంగా నడిచివస్తూండడం.. ఇదంతా తెలుస్తూంటుంది విజ్ఞులకు.
ప్రపంచం నువ్వు జవాబు చెప్తున్నంతసేపు నిన్ను ప్రశ్నిస్తూనే ఉంటుంది. ఒక్కసారి నువ్వే ప్రశ్నించడం ప్రారంభిస్తే అది ఖంగుతిని తనే జవాబుదారీగా మారి జవాబులు చెబుతూనే ఉంటుంది. స్వారీ సమర్థవంతంగా చేస్తే గుర్రం నీకు లొంగిస్వాధీనమౌతుంది. అసమర్థంగా ఉంటే కింద నేలపై పడేసి పెక్కపెక్క తన్ని తరిమేస్తుంది.
అందుకే సమర్థుడైన నిర్వాహకుడు ఎప్పుడూ పగ్గాలను తన దగ్గర, తన అధీనంలో ఉంచుకుంటాడు. ఎవరో చెబితే తను వినడం వేరు.. తను చెబుతూంటే ప్రపంచం వినయంగా విని విధేయంగా ఉండడం వేరు,
ఎందుకో లీల హృదయం వర్షించబోయేముందు, ఉరిమే ముందు ఆకాశంలా గంభీరంగా, ఆవేశంగా, ఉద్విగ్నంగా ఉంది.
ఒంటరితనం..మనిషిని వెంటాడ్తుంది.. గతాన్ని తవ్వి తవ్వి గాలివానలా ధ్వంసించి ధ్వంసించి, చిలికి చిలికి.. ఒక్కొక్కప్పుడు పుండును కాకిలా పొడిచి పొడిచి రక్తసిక్తం చేసినట్టు ..నొప్పి..హృదయంలో నొప్పి..అంతరాంతరాల్లో గుప్తమై రగిలే నొప్పి..బాధ..కసి..క్షోభ.. కన్నీళ్ళు..అపజయాలు..ఆకలి..దిక్
కాలేజిలో.. గణితం సబ్జెక్టులో ఎప్పుడూ క్లాస్‌ ఫస్ట్‌ తనే..కాలుక్యులస్‌..సంకలీకరణ..
విస్తరణ..విస్తరణ.,
జీవితాన్ని ఎవరికి వారు నిర్మించుకుంటూ, కూలిపోతూ, ఓడిపోతూ, పాఠాలను నేర్చుకుంటూ మళ్ళీ మళ్ళీ పునర్నిర్మించుకుంటూ..జీవించడమం
నిజానికి..జీవితాన్ని నిర్మించుకోవడం..తన దృష్టిలో ఒక ఇసుకగూడును కట్టడం వంటిది..కాలు తీయగానే కూలిపోవడం..మళ్ళీ సరిగ్గా మెత్తి, మరమ్మత్తులు చేసుకుని..ఒక రూపాన్ని, ఒక ఆకారాన్ని, ఒక భౌతిక ఉనికిని..ఒక స్వప్నాన్ని ఆకృతీకరించడం..గూడు అందంగా కట్టడం ఒక అధ్యాయమైతే దాన్ని అలా కొనసాగించడం, కాపాడుకోవడం, రక్షించుకోవడం..ఆ క్రమంలో గూడును ఆనందించడం మరో అధ్యాయం. నిజానికి ఈ రెండవ అధ్యాయమే కీలకమైంది.. ప్రధానమైందికూడా.
అరేబియా సముద్రంపై విమానం ఎగురుతున్నపుడు..తన హృదయం ఎంత ఉద్విగ్నమైపోయిందో.
సముద్రం లోతైందా..మనిషి హృదయం లోతైందా..సముద్రం విశాలమైందా. మనిషి హృదయం విశాలమైందా..అనంతమైన అలజడితో, కల్లోలంతో నిత్యం ప్రళయగర్భయై భాసిల్లే మహాసముద్రం నిజానికి నిత్యపోరాటంతో జీవించే నిజమైన మనిషితో పోల్చినపుడు..ఒక సమాంతర ప్రతీకగా,
మనిషి..సముద్రం – సముద్రం..మనిషి.
ఎర్నెస్ట్‌ హెమింగ్వే నవలతో రూపొందిన సాహసోపేతమైన ‘ది ఓల్డ్‌మాన్‌ అండ్ ది సీ’ సినిమా జ్ఞాపకమొచ్చింది లీలకు.
పోరాటం.. పోరాటం.. నిరంతరం ఎడతెగని పోరాటం..అంతులేని పోరాటం. బ్రతకడానికి.. ఆకలి తీర్చుకోడానికి.. డబ్బు సంపాదించడానికి .. అధికారంకోసం.. పేరు ప్రతిష్టలకోసం.. శాశ్వతమైన తన అహంతో నిండిన ఆత్మతృప్తి కోసం.. పోరాటం.. కుట్రలు..కుతంత్రాలు.. పెనుగులాటలు.. వ్యూహాలు.. పాచికలు.. మందుపాతరలు..పెదవులపై చిరునవ్వులు.. మోసపూరిత పథకాలు.. ఎన్నో, విమానం మెల్లగా ఆగడం..కాబిన్‌ లగేజ్‌నుండి అటెండెంట్‌ చేతికందివ్వగా తన అతి ఖరీదైన సామ్‌సొనైట్‌ బ్యాగ్‌ను తీసుకుని లేచి.. ఒకడుగు వేయబోతూండగా..హోస్టెస్‌ మిస్ హాస్టలర్‌ వినమ్రంగా తల పంకించి.. అంతా మౌనమే..కాని చిరునవ్వులు చిందే పెదవులు..పలకరించే కళ్ళు..ముకుళించే ముఖాలు..వ్యాపారమే ఐనా పరిమళించే మానవ సౌరభాలు..,
లీల ప్రీమియం ఎంట్రీలోకి ప్రవేశిస్తూ, తన బ్లాక్‌బెర్రీ సెల్‌ఫోన్‌ను స్విఛాన్‌చేసి ‘మెమో’ షీట్‌ తెరిచింది.
15 మే అపాయింట్‌మెంట్స్‌.
స్టే ఎట్‌ గ్రాండ్‌ రీజన్సీ ఇంటర్‌కాంటినెంటల్‌ హోటల్ రూం. నంబర్‌ 206. మహమ్మద్‌ రఫీక్‌ ఏర్పాట్లు పర్యవేక్షిస్తాడు.
మూడు అపాయింట్‌మెంట్స్‌. భారత జాయింట్ సెక్రటరీ టు డిపార్ట్‌మెంటాఫ్‌ హెవీ ఇండస్ట్రీస్‌ అండ్ పబ్లిక్ ఎంటర్‌ప్రైజెస్‌, రాంసక్సేనా, మినిస్టర్‌ ఆఫ్ పబ్లిక్ వర్క్స్‌, గవర్నమెంటాఫ్‌ అస్సాం అరుణ్‌ ఉజ్లేకర్‌, నీరజారావ్‌ కౌన్సిల్‌ ఎట్‌ ఫ్రాన్స్‌..మొత్తం రెండు గంటల నలభై నిముషాలు ఇంటరాక్షన్‌. నాల్గువందల ముప్పయి రెండు కోట్ల రూపాయల డీల్‌. తర్వాత దోహా స్థానిక ఇండస్ట్రియలిస్ట్‌ మహమ్మద్‌ బిన్‌ ఉసామాతో డిన్నర్‌..నాలుగు గంటలు నిద్ర..ఉదయం ఆరుగంటల పది నిముషాలకు ఎమిరేట్స్‌ విమానంలో ఢిల్లీకి తిరుగు ప్రయాణం.
ఎందుకో ఒకసారి తనవైపు తనే చూచుకుంది లీల..ఏర్‌కండిషన్డ్‌ బస్‌ దిగుతూ మక్‌మల్‌ మడతల మధ్య ధవళవర్ణంలో ధగధగా మెరుస్తున్న మంచిముత్యంలా ఉంది తను.
ప్రపంచాన్ని మొట్టమొదట ఆకట్టుకునేది మనిషి బాహ్యరూపు..అందం..ఆకర్షణ. ఆ తర్వాత ఆ మనిషి వ్యక్తీకరణ, ప్రతిభ, తెలివితేటలు..ఆ తర్వాత ఆర్థిక, అధికారిక, వ్యాపారాత్మక లావాదేవీలు – ఇవన్నీ ఎంతో స్పష్టంగా తెలుసు లీలకు.
లీలకు మనుషుల మూలతత్వాల గురించి చాలా విపులమైన లోతైన అవగాహన ఉంది. ఆమె ఎదుటి వ్యక్తులతో చాలా తక్కువగా, అవసరమైనపుడు మాత్రమే మాట్లాడ్తుంది. ఎక్కువగా చూపులతో అధ్యయనం చేసి మొదట ఎదుటి మనిషిలోని బలహీనతలను కనిపెడ్తుంది. ప్రతి మనిషికీ ఏదో ఒక బలహీనత ఉంటుందని బలంగా నమ్ముతుందామె. అది డబ్బు కావచ్చు, కాంతా కనకాలు కావచ్చు, అధికార వ్యామోహం కావచ్చు, పేరు ప్రతిష్టలు కావచ్చు..ఏదో ఒకటి. ఏదో ఒక వ్యామోహం ప్రతి మనిషికీ ఉంటుంది. ఆ బలహీనతను గ్రహించి సరిగ్గా అక్కడ దెబ్బకొట్టగలిగితే వాడే విజయుడు.
భారతదేశంలో ఎంత పెద్దమనిషైనా తప్పకుండా ఏదో ఒక ప్రలోభానికి లొంగుతాడు. ఎంత ఉన్నతస్థానంలో ఉన్నవాడైనా తప్పకుండా ఏదో ఒకదానికి అమ్ముడుపోతాడు. దాసోహమై తనను తాను కోల్పోతాడు. నిశ్శబ్దంగానే మనుషులను, వాళ్ళ దిక్కుమాలిన వ్యామోహ వివశతలను పసిగట్టి చెస్‌ ఆటలో పావులను కదిపినట్టు ఒక్కో వ్యూహాత్మక కదలికతో జయిస్తూ వస్తున్న తను గత థాబ్దకాలంపైగా సాధించిన విజయాలు తనకు ఒక నిషానూ, మత్తునూ కలిగించే అనుభవాలుగా మిగిలిపోయాయి. ఇంత పెద్ద మనుషులు ఇంత సుళువుగా చిత్తయిపోతారా అని ఆశ్చర్యంతో తాను బిత్తరబోయిన సందర్భాలెన్నో.,
ఐతే..చాలా సమయాల్లో అవసరానికి మించి అతిగా మాట్లాడ్డం అనే అతిపెద్ద బలహీనతని లీల ఎంతో ప్రధాన విషయంగా గమనించింది. నిజానికి ఒక ఎగ్జిక్యూటివ్‌ యొక్క వ్యూహాత్మక మౌనం ఎదుటి మనిషిలో ‘భయం’ కల్గిస్తుంది.
‘ఎగ్జిట్‌’ దగ్గరికి రాగానే తనూహించినట్టుగానే రఫీక్‌ వడివడిగా ఎదురొచ్చి ఒక అందమైన, విలువైన పూలబొకే అందించి, ఆమె చేతుల్లోని బ్యాగ్‌ను అతి వినయంగా అందుకున్నాడు.
”వెల్కం మేడం” అన్నాడు ముద్దముద్దగా.
ఆమె మాట్లాడలేదు. ఒక చిర్నవ్వు చిలకరించి మౌనంగా, గంభీరంగా అతని వెంట నడిచింది. అలా నడుస్తున్నపుడు విరజిమ్ముతున్న విద్యుత్‌కాంతుల నడుమ చుట్టూ ఉన్న ప్రపంచం ఎంతో ఆసక్తిగా అవాక్కయి తనను గమనిస్తున్నట్టు ఆమె గమనించింది.
రఫీక్‌ డోర్‌ తెరుస్తూండగా బయట సిద్ధంగా ఉన్న బిఎండబ్ల్యు కారు వెనుక సీట్లోకి చేరిందే తడవ..కారు మెత్తగా.. సర్రున నల్లని త్రాచుపాములా కదిలింది.
వేగం.. గాజుపలకపై ఇనుప గోళీలా..దూసుకుపోయే వేగం.,
తన ప్రతి క్యాంప్‌ ఏర్పాట్లను తన అత్యంత అంతరంగిక కార్యదర్శి నిర్మల స్వయంగా పర్యవేక్షిస్తుంది..మినట్‌ టు మినట్‌ కదలికలు, ప్రాంతాలు, వ్యక్తులు, వ్యవహారాలు, రక్షణ, బాధ్యతల అప్పగింతలు..అన్నింటినీ మించి ఫాలోఅప్‌, మానిటరింగ్‌.. వీటి విషయంలో నిర్మల నిజంగా సుపర్బ్‌.
‘యువర్‌ అటెన్షన్‌ ప్లీజ్‌…’ఇంగ్లీష్‌లో ప్రకటన..ఎన్ని వందలసార్లు విన్నదో తను విమానాల్లో పయనిస్తూ..ఇక విమానం భూమిపైకి దిగబోతోంది. సీట్‌ బెల్ట్స్‌ పెట్టుకోండి, సీట్లను నిటారుగా ఉంచుకోండి. సెల్‌ఫోన్లను స్విచాఫ్‌ మోడ్‌లోనే ఉంచండి..వంటి అంశాలు..చివరికి పైలట్‌ ‘దయతో ప్రయాణంలో సహకరించినందుకు మీకందరికీ ధన్యవాదాలు..’అని ఓ సాంప్రదాయ వినమ్ర నివేదన.
ర్ర్‌ర్‌ర్‌మని ..విమానం టైర్లు నేలను తాకిన మ్రోతతో కూడిన భీకర ధ్వని.. కుదుపు. విడిచిన బాణంవలె దూసుకుపోతున్న గాలిధ్వని..ఒక పెద్ద సంరంభం.
ప్రక్కనున్న కిటికీలోనుండి చూచింది లీల. దోహా నగరం విద్యుత్‌కాంతులతో మిలమిలా మెరిసిపోతోంది. కతార్‌ ఎయిర్‌వేస్‌ ప్రధాన స్థావరం. అరబ్‌ దేశాల గుండెలా ఎదుగుతున్న అంతర్జాతీయ విమానయాన క్షేత్రం. ఇస్లాం సాంప్రదాయాలను పాటిస్తూనే వడివడిగా అంతర్జాతీయ స్థాయిని అందుకుంటున్న అత్యాధునిక విమానయాన సంస్థ కతార్‌.
తన ఆల్ గోల్డ్‌ వాచ్‌ చూచుకుంది లీల.
ఎనిమిది గంటల పన్నెండు నిముషాలు..’ఇప్పుడు నిర్మల తనతో మాట్లా..’అని మనసులో అనుకుంటూండగానే ఆమె సెల్‌ఫోన్‌ మోగింది.
”గుడీవినింగ్‌ మేడం..మీ కారు దోహా మాల్‌ దాటి అల్‌ ఖలీషా రోడ్‌లోకి ప్రవేశిస్తోందా..”
”ఎస్ నిర్మలా..”
”ఇంకో పన్నెండు నిముషాల్లో మీరు హోటల్ గ్రాండ్‌ రీజన్సీలో ఉంటారు. ఫ్రెషప్‌ కాగానే..సరిగ్గా తొమ్మిది గంటలకు రాంసక్సేనా ఐఎఎస్‌ మీ గదికొస్తాడు. అతను ఫ్రాన్స్‌లో జరుగుతున్న ఇంటర్నేషనల్‌ కాన్ఫరెన్స్‌లో ‘పరిశ్రమలు – పర్యావరణ కాలుష్యం..నివారణ’ అంశంపై మాట్లాడ్డానికి రెండ్రోజుల క్రితమే ఫ్రాన్స్‌లో ఉన్నాడు. మీతో మాట్లాడి ఆ ఎనభైకోట్ల రూపాయల ఎబిటు జీరోఫైవ్‌ బాపతు డీల్‌ను ఫైనల్‌ చేస్తాడు. అందుగ్గాను మనం అతనికి ఆరుకోట్ల క్యాష్‌ను స్విస్‌ బ్యాంక్‌ హిడెన్‌ కాతాకు బదిలీ చేస్తాం.. మేడం ఒకసారి మీ లాప్‌టాప్‌లో రెండు నిముషాల క్రితం నేను మీ జడ్‌ మెయిల్‌కు పంపిన ఫోల్డర్‌లో చూడండొకసారి. ఓవర్‌ వ్యూ వస్తుంది.. సి యు మేం..”గడగడా, స్పష్టంగా, పొల్లుపోకుండా చెప్పుకుపోయింది నిర్మల.
ఎందుకో లీల చిన్నగా నవ్వుకుని..లాప్‌టాప్‌ను తెరిచింది. ప్రపంచంలోనే అతి సన్నని లెనోవా 0.9 ఇంచ్‌ కంప్యూటర్‌ అది. చకచకా రిడిఫ్‌ మెయిల్‌ తెరిచి తన రహస్య పన్నెండవ ఇ మెయిల్‌ క్లిక్ చేసింది. నిముషమున్నర క్రితం వచ్చిన నిర్మల మెయిలది.
ఆంధ్రప్రదేశ్‌కు చెందిన రాం ఇన్ఫోటెక్‌ అనే సంస్థ ప్రవీణ్‌రెడ్డి నేతృత్వంలో ప్రపంచ వ్యాప్తంగా పద్దెనిమిది సాఫ్ట్వేర్ కంపెనీలలో వ్యాపార కార్యకలాపాలను నిర్వహిస్తోంది. కంపెనీ వ్యాల్యూ ప్రైస్‌వాటర్‌ కూపర్‌ మదింపుద్వారా నాల్గువేల కోట్లుగా నిర్దారించబడింది. ప్రస్తుతం భారత ప్రభుత్వం ప్రవేశపెట్టిన సెజ్‌ల ఏర్పాటుక్రింద భారత ప్రభుత్వానికి భూమి కేటాయింపు గురించి ధరఖాస్తు పెట్టుకుంది. నూటా యాభై ఎకరాలను కనీస నామమాత్రపు ధర క్రింద రాం ఇన్ఫోటెక్‌కు కేటాయిస్తే నాల్గు సంవత్సరాలలో స్థలాన్ని అభివృద్ధిపర్చి, పరిశ్రమను స్థాపించి, మూడు వేలమందికి ఉపాధి..,
..ఇలా ఉంది ఫైల్‌-
‘అంతా ట్రాష్‌.. చెత్త…’అనుకుని వాస్తవస్థితిని ఉజ్జాయింపుగా అంచనా వేసింది లీల. నూటా యాభై ఎకరాలను ఎకరానికి యాభైవేల చొప్పున కొనుక్కుని ఏడున్నరకోట్ల పెట్టుబడితో నాల్గుసంవత్సరాల తర్వాత మూడువందల కోట్ల ఆస్తిగా మార్చుకోవాలని దుష్టమైన ప్రణాళిక. అందులో ముఖ్యమంత్రి బామ్మర్ధి కొడుకు పేరుమీద ఇరవైకోట్ల నగదు లంచం, భారీ పరిశ్రమల మంత్రి ఉంపుడుగత్తెకు పదికోట్లు.. మిగతా తతంగమంతా ప్రవీణ్‌రెడ్డి చూచుకోవాలి. ఆ పరంపరలో క్లియరెన్స్‌కోసం ఒక క్లెయింట్‌గా తమను ఆశ్రయించాడు ప్రవీణ్‌రెడ్డి. ‘లీలకు కేస్‌ అప్పజెప్పి కూచుంటే అంతా నిశ్చింత. బేఫికర్‌. ముందే కన్సల్టెన్సీ ఫీ మాట్లాడుకుని డాక్యుమెంట్లన్నీ ఇస్తే యిక అన్ని లెవెల్స్‌లో లీల తనే మేనేజ్‌ చేసుకుని పనిని సాధించిపెడ్తుంది.. బ్లాక్‌ యాక్టివిటీస్‌ చేయడానికి లీల హైలీ రిలయబుల్‌ వైట్‌ ఏజెంట్. ముందే అంతా స్పష్టం..’
లంచాల కింద ఇరవైరెండు కోట్లు..తన ఫీ ఐదు కోట్లు..టైం పీరియడ్ మూడు నెలల పదిరోజులు-
కేస్‌ స్టేటస్‌.. స్టేట్‌ గవర్నమెంట్‌నుండి అన్నీ క్లియరై..అనుకూలమైన రిమార్క్స్‌తో ఫైల్‌ భారత ప్రభుత్వ భారీ పరిశ్రమలు మరియు పబ్లిక్ ఎంటర్‌ప్రైజెస్‌కు పంపబడింది..పద్నాల్గు రోజుల క్రితం. ఫైల్‌ నంబర్‌ ఎఫ్‌ఫోర్‌ / టు త్రీ ఫైవ్‌ సిక్స్‌ / ఇండస్ట్రీస్‌ / 09 తేది 6 జూన్‌ రెండువేల తొమ్మిది.
అంతా అర్ధమైంది లీలకు.
తమకు అప్పటికే రెండుకోట్ల అరవై లక్షల అడ్వాన్స్‌ ముట్టింది. లంచాలు ఎనిమిది కోట్ల చిల్లర ఖర్చయింది.. ఇప్పుడు జాయింట్ సెక్రటరీ రాంసక్సేనా స్వయంగా ‘సెజ్‌’ శాంక్షన్‌ కాగితాలను తన దగ్గరకు తెచ్చిస్తాడు. అదీ ఏర్పాటు.
ఈ పనిని సాధించడానికి తన ఆధీనంలో పనిచేసే ఎందరో రిటైర్డ్‌ ఐఎఎస్‌ ఆఫీసర్లలో ఫార్మర్‌ హోం సెక్రటరీ రాజన్ పిళ్ళై ఎంతో సహకరించారు. పిళ్ళై, రాంసక్సేనా యిద్దరూ బాటిల్‌మేట్స్‌..రూట్‌ దొరికింది. సరియైన పనికి సరియైన నైపుణ్యంగల మనిషిని వెదికిపట్టుకుని ఆ పనిని అప్పజెప్పి నిర్విఘ్నంగా సాధించడమే ఒక మంచి మేనేజర్ లక్షణం.
నవ్వొచ్చింది లీలకు..ఈ ప్రపంచంలో ఎవడైనా డబ్బుకు లొంగేవాడేకదా..ఒకడు ఎక్కువకు, మరొకడు ఇంకా ఎక్కువకు.. కాని లొంగడం మాత్రం ఖాయమైన వర్తమానంలో మనిషి ‘మార్కెట్‌’గా మారి…వ్చ్‌, క భ్రాంతిమయ అనుభూతి ఆమెను ఆకస్మాత్తుగా ఆవహించింది. ఎక్కడి ఆంధ్రప్రదేశ్‌లో తూఫ్రాన్‌ వద్ద వెంకట్రావ్‌పల్లె దగ్గరి సెజ్‌..ఎక్కడి ఢిల్లీ…ఎక్కడి ప్రవీణ్‌రెడ్డి, ఎవరీ లీల..ఎక్కడి దోహా..ఎవరీ రాంసక్సేనా..ఆ భూమి తాలూకు కాగితాలను యిక్కడ..ఈ అరబ్‌ గడ్డపైకి తెచ్చి తనకు యివ్వడమేమిటి..?
వ్యాపారం..అంతా వ్యాపారం..డబ్బు..డబ్బు..,
మార్క్స్‌ అన్నట్లు..మానవ సంబంధాలన్నీ వ్యాపారాత్మక ఆర్థిక సంబంధాలేనా?
కారు ట్రాఫిక్‌ను చీల్చుకుంటూ డి- రింగ్‌రోడ్‌, అల్‌ సౌదన్‌, ఫరీజ్‌ అల్‌ అమిర్‌ రోడ్‌ మీదుగా..గ్రాండ్‌ రీజెన్సీ హోటల్ చేరుకుని..పొర్టికోలో ఆగి-
మెరుపులా రఫీక్‌ కిందికి దిగి..డోర్‌ తెరిచి.,
అద్భుతమైన హోటల్ అది. రోజుకు రెండువేల యాభై యుఎస్‌ డాలర్స్‌. గేట్‌ దగ్గర ఆరున్నర అడుగులఎత్తు ఓ షోమ్యాన్‌ వినయంగా వంగి సలాం చేసి..,
డబ్బు.. డబ్బు..డబ్బుతో హోదా..హోదాతో గౌరవం..గౌరవంతో తృప్తి, అహం..అహం ఒక ఎడతెగని నిషా.. రాజ్యాలూ, రాజ్యాధికారాలూ అన్నీ అహంతో సంభవించిన దర్పంతోనే ధ్వంసమైపోయినట్టు అరుస్తూ చెప్పే మానవ చరిత్ర.,
రఫీక్‌ అప్పటికే రిసెప్షన్‌లోనుండి లేజర్‌ మానిటర్‌ను తీసుకుని, పెద్ద హాల్‌కు ఒక ప్రక్కన ఉన్న కాంతులీనే లిఫ్ట్‌ దగ్గరికి తోడ్కొనిపోయి,
…రెండు వందల ఆరు..ఎగ్జిక్యూటివ్‌ సూట్‌..చుట్టూ గాజు తలుపుల్లోనుండి.. స్విమ్మింగ్‌ పూల్‌.. దూరంగా సముద్రం.. ఇటు ప్రక్క గార్డెన్‌..సన్నగా సంగీతం..వాతావరణం నిండా ఏదో భాషకందని మత్తు..శరీరాన్ని వీణతంత్రులను మీటినట్టు పులకింపజేసే పరిమళం., గాలినిండా ఏదో మహత్తరమైన వివశత.
”మేడం ..షలై టేక్ లీవ్‌.. మై డ్యూటీ ఈజోవర్‌..మార్నింగ్‌ మిస్టర్‌ నాయర్‌ విల్‌ కం ఎట్‌ ఫైవ్‌ థర్టీ.. టు టేక్ యు టు ఏర్‌పోర్ట్‌..’రఫీక్‌.,
”ఓకే..థ్యాంక్యూ.”
రఫీక్‌ వంగి..సలాం చేసి..అతను దృఢంగా..కండలు నిండిన శరీరంతో అరబ్‌ గుర్రంలా ఉన్నాడు. వీళ్ళందర్నీ ఇండియా నుండి నిర్మల ఏర్పాటు చేస్తుంది. రఫీక్‌కు వెళ్ళేప్పుడు రిసెప్షన్‌లో ఐదువందల డాలర్ల టిప్‌ ముడ్తుంది. అతని రోజుకూలీ వేయి డాలర్లు కాకుండా. ఊహకందని పేమెంట్స్‌. ప్రతి రహస్య కార్యకలాపం చాలా ఖరీదుగానే ఉంటుంది మరి.
రఫీక్‌ వెళ్ళగానే..వెన్నెల ముద్దలా ఉన్న డబుల్‌ బెడ్‌పై ఒక్క క్షణం ఒరిగి కళ్ళు మూసుకుంది లీల.
‘కన్ను తెరిస్తే ఒక ప్రపంచంలో నువ్వు ,
కన్ను మూస్తే నీలోనే ఒక గర్జించే ప్రపంచం..’ఎవరివో కవితాపంక్తులు.
వేగం.. వేగం..ఒక అతివేగవంతమైన ప్రపంచంలో కాలాన్ని వేటాడ్తూ తను..తనను వెంటాడ్తూ కాలం..ఊపిరి సలపని పరుగులో పూర్తిగా మృగ్యమైపోయిన విచక్షణ..తనలోకి తను తొంగి చూచుకోలేని తీరికలేనితనం..నిజానికి ఒక్కసారైనా ఆత్మలోకి అవలోకించుకోడానికి తనకే తెలియని ఏదో భయం.
అసలేంచేస్తోంది తను..ఎక్కనినుండి మొదలై ఎక్కడికి కొనసాగుతోంది తన గమనం..అసలు తనకు ఒక గమ్యం అనేది ఉందా..తన అంతిమ లక్ష్యం ఏమిటి?
సుడిగాలిలోని కాగితం ముక్కకు ఒక థ, దిశ ఉంటుందా.?
ఎందుకో ఒక్కసారిగా ఒళ్ళు జలదరించినట్టయి..దిగ్గున లేచి..బాత్‌రూంలోకి వెళ్ళింది. అన్నీ స్వర్గాన్ని మరిపించే ఏర్పాట్లు. మంచుతుంపరలు కురుస్తున్నట్టు కాంతి. తెల్లని వెండి మేఘాల తరగలపై నడుస్తున్నట్టు నేల..సన్నగా ఏదో మృదుధ్వని..పరిమళం.,
స్నానం కానిచ్చి..బట్టలను మార్చుకుని..డ్రైయర్‌కింద ఆరబెట్టకున్న జుట్టును విరబోసుకుని..డ్రెస్సింగ్‌ టేబుల్‌ముందు ..బంగారు చెంపలకు ఓలె క్రీం కొద్దిగా పూసి..,
‘ఎంత అందంగా ఉంది తను’ అనుకుంది లీల ఎదుట అద్దంలో తనను తాను చూచుకుంటూ..నాల్గడుగులు వెనక్కునడచి., బెడ్‌పై వాలి.,
టైం ఎనిమిదీ యాభై ఐదు.,
సెల్‌ఫోన్‌ మ్రోగింది.. నిర్మల.
”మేం. రాం సక్సేనా ఈజ్‌ ఆన్‌ద వే. వితిన్‌ ఫైవ్‌ మినట్‌ హి విల్బీ..”
ఫోన్‌ కట్‌ చేసింది ఏమీ మాట్లాడకుండానే
‘జిన్హే హమ్ భూల్‌నా చాహే..ఓ అక్సర్‌ యాద్ ఆతీహై..’అనూహ్యంగా ముఖేశ్‌ గీతం వినబడింది చానల్‌ మ్యూజిక్‌లో..సన్నగా.,
కత్తితో వెన్నముక్కను ఎవరో కోస్తున్నట్టు..సర్‌ర్‌ర్‌మని ఏదో..చటుక్కున సముద్రమై పొంగిన దుఃఖం..ఆకాశమంత ఎత్తున్న అల విరిగి పైనబడ్డట్టు ఏదో బీభత్స విధ్వంసం..
ఒక్కపాట..ఒక్క చరణం..మనిషిని ఇంతగా కకావికలు చేస్తుందా..?
వ్చ్‌.,
సరిగ్గా అప్పుడే..బయట బజర్‌మ్రోగింది.
లీలకు తెలుసు..వచ్చింది రాం సక్సేనా అని..చేతిలోని లేజర్‌ రిమోట్‌తో బయటి డోర్‌ తెరిచింది.
ఔను రాంసక్సేనానే..”గుడీవినింగ్‌ మేడం” అన్నాడు వస్తూనే.
‘ప్లీజ్‌’ అంది..ఎదుట ఉన్న సోఫా చూపిస్తూ.
రెండు నిముషాల మౌనం..నిశ్శబ్దం..తర్వాత..అతను తన బ్రీఫ్‌కేస్‌ను తెరిచి ఒక అందమైన ప్లాస్టిక్ ఫోల్డర్‌ను ఆమెకు వినయంగా అందించాడు.
సక్సేనా యిదివరకు ఢిల్లీలో జరిగిన ఒక పెళ్ళివిందులో తనకు పరిచయం. పిళ్ళై చేశాడు.
”శాంక్షన్‌ ప్రోసీడింగ్సాఫ్‌ దట్‌ సెజ్‌..మిస్టర్‌ ప్రవీణ్‌రెడ్డీస్‌..”
”ఊఁ..”కాగితాన్ని పరిశీలనగా, మెరుపుపాటుకాలంలో చూచి,
”హౌమచ్‌ యుహావ్‌ రిసీవ్డ్‌ సోఫార్‌”
”టు క్రోర్స్‌ మేడం. మిస్టర్‌ పిళ్ళై కన్‌సెంటెడ్‌ దిస్‌ అసైన్‌మెంట్‌ యాజె ప్యాకేజ్‌ ఫర్‌ ఫోర్‌ క్రోర్స్‌..”అని అర్ధాంతరంగా ఆగి.,
”ఐనో..ఐనో..”
”ఆల్రెడీ.. దిస్‌సెజ్‌ శాంక్షనీజ్‌ పబ్లిష్డ్‌ ఇన్ ఎస్టర్‌డేస్‌ గెజిట్‌”
”ఓకే..”
లీల చకచకా తన లాప్‌టాప్‌ను తెరిచి..ఏదో అకౌంట్‌లోకి వెళ్ళి ఇ-ట్రాన్స్‌ఫర్‌ ఆపరేషన్‌ ప్రారంభించి.,
”యు వాంట్‌ దిస్‌ మనీ టు బి క్రెడిటెడిన్‌ యువర్‌ జడ్‌ టు జడ్‌..హిడెన్‌ అకౌంట్‌..ఈజిట్‌”
”యస్‌ మేం..”
”నౌ దిసీజ్‌ డన్‌..యు కెన్‌ వెరిఫై..”
”నాట్ నెసెసరీ మేం..ఐ బిలీవ్‌”
దొంగల మధ్య నిజాయితీ, క్రమశిక్షణ, వృత్తిధర్మంపట్ల నిబద్ధత ఎక్కువగా ఉంటుంది. హవాలా లావాదేవీలన్నీ ప్రపంచవ్యాప్తంగా కాగితంముక్కకూడా ఆధారంలేకుండా అందుకే నిక్కచ్చిగా జరుగుతున్నాయి..కోట్లకు కోట్లుగా.
రాంసక్సేనా లేచి..” ఐ టేక్‌లీవ్‌ మేం..ఆల్వేస్‌ వుయ్‌ విల్బీ ఎట్‌ యువర్‌ డిస్పోజల్‌” అని వినయంగా తలపంకించి,
డబ్బు ముందు..వాడు ఐ ఎ ఎస్సా..ఆర్మీ ఆఫీసరా..రాజకీయ నాయకుడా..అన్న మీమాంస లేదు. లొంగిపోవాల్సిందే.. రేటు మారుతుందంతే.
అతను వెళ్ళిపోయాడు.
కాగితాన్ని బ్రీఫ్‌కేస్‌లో పెట్టింది. ఈ ఫైల్‌ క్లోజ్‌. హైద్రాబాద్‌ పోగానే ఇంకో యాభై లక్షల రూపాయలను పంచిపెడితే ఈ సెజ్‌ ప్రవీణ్‌రెడ్డి పరమైపోతుంది. భూమి వానివశమైపోయే కాగితాలన్నీ చకచకా తయారౌతాయి. ఫైనల్‌ సెటిల్‌మెంట్‌ింద మిగిలిన రెండు కోట్ల నలభై లక్షలు తన బినామీ అకౌంట్‌లో జమైపోతుంది.
అన్నీ అంకెలు…ఒక అంకెప్రక్కన ఎన్నో ఎన్నో సున్నాలు.
అంకె లేకుంటే ప్రక్కనున్న సున్నాల విలువ సున్న. ప్రక్కన సున్నాలు లేకుంటే ఒంటరి అంకె విలువ విలువ లేనిదే.,
తను ఒక అంకెనా..ఒక సున్నానా..వాటి సమ్మేళనమా.,
అస్సాం పవర్‌ మినిస్టర్‌ అరుణ్‌ ఉజ్లేకర్‌ అపాయింట్‌మెంట్‌ తొమ్మిదీ యాభై నిముషాలకు..ఇంకా అరగంట టైముంది.
చకచకా లిక్కర్‌ ర్యాక్‌ తెరిచింది..మాకల్లన్‌ విస్కీ బాటిల్‌. సోడా సీసా, ఐస్‌క్యూబ్స్‌.. క్రిస్టల్‌ గ్లాస్‌లో మిలమిలా మెరుస్తూ స్వర్ణద్రవం.
‘జిన్హే హమ్ భూల్‌నా చాహే..’
ఏవైతే మరిచిపోవాలనుకుంటూంటామో..ఆ జ్ఞాపకాలే ఎందుకో మళ్ళీ మళ్ళీ వెంటాడ్తూంటాయి మనిషిని.
జ్ఞాపకాలు ముఖంపై వర్షపు చినుకుల్లా..శిరసుపై చిరుజల్లు ముసురులా, మూసిన కళ్ళపై ముసిరే తూనీగల్లా.. ఒంటరిగా నడుస్తున్నపుడు తలపై రాలే పొన్నపూల జల్లులుగా,
ఎక్కడో వీణతీగ మ్రోగి..రాగాలను చిందించి..మైమరపించి..చటుక్కున తెగి..అతికి..మళ్ళీ తెగి..,
అతను జ్ఞాపకమొచ్చాడు..అతను..పన్నెండే
మనసు నిండా ఒక సముద్ర గంభీర నిశ్శబ్దం.. స్తబ్ద ప్రళయం..మౌన అలజడి.,
అస్సాం మంత్రి అరుణ్‌ రావడానికి..ఇంకా పదినిముషాలు.
తెలుసు..ఆ కేస్‌ వివరాలన్నీ లీలామాత్రంగా మేథోపథంలో ఉన్నాయి. డిబ్రూగడ్‌లో స్థాపించబడ్తున్న రెండు వందల తొంబయ్‌ మెగావాట్ల పవర్‌ప్లాంట్‌లో రెండు గ్యాస్‌ టర్బయిన్ల నిర్మాణ కాంట్రాక్ట్‌ను ఆంధ్రప్రదేశ్‌కు చెందిన ‘మిత్రా కన్‌స్టక్షన్‌’కు యిప్పించాలి. నూటా ఎనభై కోట్ల రూపాయల కాంట్రాక్ట్‌. మిత్రా కన్‌స్ట్రక్షన్‌ కాకతీయ గ్రూప్‌ ఇండస్ట్రీస్‌కు చెందిన దామెర లక్ష్మయ్యది. స్వంత రాష్ట్రంలో కాంట్రాక్ట్‌లు చేస్తే బద్‌నాం ఔతున్నామని ఇతర రాష్ట్రాలకు ఎగబాకుతున్న కంపెనీ. పదికోట్ల డీల్‌. గ్యాస్‌ రేట్‌ ఒడంబడికలో తను చేస్తున్న రేటు పెంపుదలతోనే ఎనిమిది కోట్ల లాభం వాడికి. చిన్న వెంట్రుకవాసి రేటు తేడా కొన్ని కోట్ల రూపాయల ఫలిత ప్రభావాన్ని చూపిస్తుంది.
సరిగ్గా పది నిముషాల తర్వాత కాలింగ్‌ బజర్‌ మ్రోగింది. తెలుసు లీలకు ఆ వచ్చింది అరుణ్‌ అని.
బెడ్‌పై కొద్దిగా సర్దుకుంటూనే.. లేజర్‌ రిమోట్‌తో డోర్‌ తెరిచి..
‘రాజకీయ నాయకులు, మంత్రులంటే పచ్చి లంజలకంటే కడహీనులు’ అనుకుంటూండగానే,
”గుడ్‌ మార్నింగ్‌ మేడం…”
వీడికి మార్నింగ్‌..ఈవినింగ్‌., నైట్‌ ..తేడాలు తెలియట్లేదనుకుని.,
”బోలియే ఉజ్లేకర్‌ సాబ్‌..కైసేహై ఆప్‌” అంది.
”బహుత్‌ మజేమే..”
”హమ్ ఆప్కో..”
”పూరా యాద్ హై..ఇస్ హఫ్తామే ఓ లక్ష్మయ్య సాబ్‌కా కాగజ్‌ దస్తకత్‌ కర్కే బేజ్‌దేంగే…పూరా కామ్‌ హోగయా.. బేఫికర్‌..”
”కామ్‌ హోతేహీ..ఆప్‌కా కిసీ ఆద్మికో ఢిల్లీమే 9390109293 నంబర్‌ మే కాంటాక్ట్ కర్లేకే పూరా దో కరోడ్‌ క్యాష్‌.. దౌజంట్‌ నోట్స్ లేజానా..ఓ ఆర్డర్‌లేకే హమ్‌కో ఫాక్స్‌ కర్‌దేనా..ఠీక్‌ హై”
”ఠీక్‌ హై మేడమ్‌..ఏక్‌ దమ్‌..పూరా క్యాష్‌ మిలేగా క్యా”
”హా..వోహీ చాహియేనా ఆప్కో”
”హా”
అతను లేచాడు.. మరో రెండు నిముషాల్లో ఆమెవైపు భయం భయంగా, కొద్దిగా ఆశగా ఆకలిగా చూచి..నీళ్ళు నములుతూ.., బై” అంది లీల.
ఖేల్ కతమ్‌..తాలీ బజావ్‌.,అరుణ్‌ ఉజ్లేకర్‌ నిష్క్రమించాడు.
లీలకు అస్సాం గ్యాస్‌ పవర్‌ ప్లాంట్‌లో జపాన్‌ ప్రభుత్వం పరస్పర అభివృద్ధి పథకాల, పరస్పర సహకార ప్రణాళికల కింద ముప్పయి ఎనిమిది మిలియన్ల ఎన్స్‌ అప్పు..ఆ తతంగమంతా జ్ఞాపకమొచ్చింది.
అప్పు అంతా ప్రజలవంతు..ఆనంద తాండవాలన్నీ, అనంత సుఖాల భోగాలన్నీ ప్రభుత్వాధికారులదీ, రాజకీయ నాయకులదీ ఐన ఈ వర్తమానం దేశాన్ని ఎవరికెవరికి, ఎంత దారుణంగా కుదువ బెడ్తోందో తలుచుకుంటే..అయ్యో పాపమనిపించి, నిట్టూర్చి.,
ఆకలి అనిపించింది లీలకు..అకస్మాత్తుగా.,
ముందరున్న స్క్రీన్‌పై చికెన్‌ టిక్కా, ఖలీఫా తందూరి ముర్గా ఆర్డర్‌ చేసింది.
ఎదురుగా..పల్చని బంగారు మాకల్లన్‌ విస్కీ ద్రవం..తెల్లని మంచుపూల వలె ఐస్‌.,
ఒక సిప్‌ చేసి.,
ప్రపంచం యావత్తు ఆనంద సముద్రంలో తేలిపోతున్నట్టనిపించి,
ఏ మనిషికైనా తన దుఃఖమే ప్రపంచదుఃఖం..తను అనభవిస్తున్న తన ఆనందమే చుట్టూ ఉన్న ప్రపంచ మానవాళి అందరి ఆనందమనుకుంటూ..ఒక భ్రాంతిలో బ్రతుకుతూ..ఒక మార్మిక ఆత్మవ్యంజనలో..,
ఇంకా గంట సమయం ఉంది..ఆ రోజు మూడవ కేస్‌ నీరజా రావ్‌తో. ఒక జర్మనీ కంపెనీ భారతదేశంలో స్థాపించాలనుకుంటున్న ఆటోమొబైల్‌ కంపెనీ తాలూకు అన్ని క్లియరెన్స్‌లు, ల్యాండ్‌ అలాట్‌మెంట్‌.. వగైరా ఏర్పాట్లన్నీ.. మూడువేల కోట్ల ప్రాజెక్టు. అందులో స్పెషల్‌ గ్రేడ్‌ రోవర్‌ వెహికిల్స్‌ను ఆరేళ్ళపాటు ఇండియన్‌ డిఫెన్స్‌ కోసం కొనుగోలు చేసేందుకు యంఓయూపై అడ్మిరల్‌ కులకర్ణీతో ఒప్పందం..డీల్‌-
‘అబ్బా..యిప్పుడు ఓపిక ఉందా..ఇదంతా చేయడానికి..’అనుకుంది లీల.
లేదు.. అని గోముగా జవాబొచ్చింది లోలోపల్నుండి.
వెంటనే నిర్మలకు ఫోన్‌ కలిపింది లీల..
‘నిర్మలా..కెన్‌ యు గెట్‌ నీరజారావ్‌ ఆన్ లైౖన్‌ ఫర్‌ డిస్కషన్‌..ఐ కాంట్‌ మీట్‌ హర్‌ పర్సనల్లీ నౌ..ఐ షల్‌ డిస్పోజ్‌హర్‌ ఓవర్‌ ఫోన్‌ ఓన్లీ.’
‘యస్‌ మేం. ఐ విల్‌ బి బ్యాక్ టు యు ఆఫ్టర్‌ టెన్‌ మినట్స్’
లైన్ తెగిపోయింది.,
ఒక దేశపు సైనిక శిబిరాల్లోనైనా తన సంస్థలో ఉన్న క్రమశిక్షణ ఉంటుందా. నిబద్ధత ఉంటుందా. బాధ్యతలపట్ల ఇంత అంకితభావముంటుందా అని అనిపించింది లీలకాక్షణంలో.
ఈ రోజు లీల ఒక వ్యక్తి కాదు.. ఒక వ్యవస్థ. భారతదేశం కేంద్రంగా ప్రపంచవ్యాప్తంగా ఏ పనంటే ఆ పని.. రాజకీయ, ఆర్థిక, వ్యాపార, సైనిక, రాయబార సకల రంగాల్లో ఏదైనా సరే.. ఆ పనిని అతి విశ్వసనీయంగా నిర్వహించగల ఏకైక శక్తి.. లీల.
లీల అంటే..నమ్మకం..గ్యారంటీ..లీలంటే ఒక ఓటమి ఎరుగని విజయం..లీలంటే ఒక వ్యూహాత్మక కార్పొరేట్‌ ఎత్తుగడ.. ఒక ఆధిపత్య ప్రతీక.
మొబైల్ సన్నగా ప్రకంపించింది.
”హలో”
” మేడం. నేను నీరజా రావ్‌ని..”
”హై..హలో నీరజా..చెప్పు..”
”మీరు చెప్పిన పనులన్నింటినీ విజయవంతంగా ముగించాను మేడం. రిపోర్ట్స్‌న్నీ నా దగ్గరున్నాయి. జర్మనీ ఆటోమొబైల్‌ జెయింట్‌ రోవర్‌కు ఆదిలాబాద్‌ దగ్గర వందా యాభై ఎకరాల స్థల కేటాయింపు, వాళ్ళు తయారుచేసే డిఫెన్స్‌ యుటిలిటీ వెహికిల్స్‌కు ఆరేళ్ళపాటు పర్చేజ్‌ గ్యారంటీ ఒప్పందం..అంతా ఓకే..సంబంధిత అధికారులు, నాయకులు, మంత్రులు..అందరూఓకె. పద్దెనిమిది కోట్ల లంచాలు..మిసలేనియస్‌ ఖర్చులు ఇంకో రెండు కోట్లు. వెరసి మీరు ఈ డీల్‌ను ముప్పయికోట్లకు ఓకే చేసుకోవచ్చు. మేడం, రోవర్‌వాళ్ళు ఐదుకోట్లు మన కువైట్‌ అకౌంట్‌లో రేపు వేస్తామంటున్నారు. మీరు ఓకే అంటే.. ఐ విల్‌ వెయిట్‌ ఫర్‌ యువర్‌ ఇన్‌స్ట్రక్షన్స్‌.”
నీరజా రావ్‌ ఐఐఎమ్‌ బెంగళూర్‌ యంబిఎ క్వాలిఫైడ్‌. మెరుపులాంటి మేధ.. చూపితే కొండ ప్రాకే తత్వం. తన కన్‌సెల్టెన్సీలో మిడిల్‌ ఈస్ట్‌ ఇంచార్జ్‌. కాని పైకి మాత్రం ఫ్రాన్స్‌లోని రోవర్‌ కంపెనీలో రెసిడెంట్‌ కన్‌స్టలెంట్‌..
అంతా బినామి..
ఎక్కడా..తమ పేరు ఉండదు బాహాటంగా..అంతర్గతంగా మాత్రం అంతటా తమ పేరే ఉంటుంది.
ఉండీలేనట్టుగా..లేకా ఉన్నట్టుగా అనిపించేదే లీల కదా.
లీల ఒక మిథ్య…ఒక సత్యం..ఒక స్వప్నం..ఒక సందిగ్ద సందర్భం..భయంకొల్పే వాస్తవం..అంతిమంగా ఒక ఓటమి ఎరుగని విజయం.
చటుక్కున ఏదో తోచినట్టు ఉలిక్కిపడి..నీరజారావ్‌కు ఫోన్‌ కలిపింది క్షణంలో. ఆమెతో డైరెక్ట్ కాంటాక్ట్ డ్యూటీలో ఉన్న తమ ఇన్నర్‌ సర్కిల్‌ అసోసియేట్స్‌ లీల స్పెసిఫిక్‌ టూర్‌లోఉన్నప్పుడు హై అలర్ట్‌లో హాట్‌లైన్‌పై అందుబాట్లో ఉండి క్షణాల్లో ఆన్‌లైన్‌లో కొస్తారు పిలవగానే. లీల కంపెనీ పనిసంస్కృతి అది.
‘వెల్‌ నీరజా..రోవర్‌తో డీల్‌ పక్కా చెయ్‌’. మనం లాస్ట్‌ డిస్కషన్‌లో మెక్సికన్‌ కంపెనీ రిచర్డ్‌సన్‌ పవర్‌ సిస్టమ్స్‌ గురించి చర్చించాం. గుర్తుందా. కువైట్‌లో మన ఆంధ్రప్రదేశ్‌కు చెందిన కూరపాటి అండ్ సన్స్‌ గ్లోబల్‌ టెండర్‌కు అడ్డుతగుల్తున్నాడు వాడు. వాళ్ళ బిజినెస్ ఎగ్జిక్యూటివ్‌ వచ్చే ఇరవై ఎనిమిదిన ఫ్రాంక్‌ఫర్ట్‌ వస్తున్నాడు. డిటెయిల్స్‌, ఫ్లైట్‌ నంబర్‌, హోటల్..వివరాలన్నీ నీకు మెయిల్‌లో వస్తాయి. వాణ్ణి టాకిల్‌ చేయాలి. వినకుంటే వాటర్స్‌ హాలో రోడ్‌లో ఆరోజు రాత్రి ఒక రోడ్‌ యాక్సిడెంట్‌పేర వాణ్ణి లేపెయ్యాలి. వాడు ఆరోజు జాన్సన్స్‌ రిక్రియేషన్‌ క్లబ్‌లో ఒక పార్టీలో పాల్గొంటాడు. ఆపార్టీనుండి వస్తూండగా..ప్లీజ్‌ నోట్’
”ఓకే మేం..”
”గెట్‌ బ్యాక్ టు మీ..ఆన్ ట్వంటీ నైన్త్‌ ఈవినింగ్‌ ఎట్‌ సిక్సోక్లాక్‌ పాజిటివ్లీ”
”యస్‌ మేం..”
ఫోన్‌ పెట్టేసి..టకటకా ఆంధ్రప్రదేశ్‌ మంత్రివర్గంలోని ఒక సీనియర్‌ మంత్రి విశ్వనాథరెడ్డికి లైన్ కలిపి..”మీరు రేపు ఉదయమే..ఎనిమిది గంటలలోపు ప్రెస్‌మీట్‌ పెట్టి ముఖ్యమంత్రి పనితీరుపై, అసమర్థతపై మండిపడ్తూ తీవ్రపదజాలంతో ఒక స్టేట్‌మెంట్‌ ఇవ్వండి. చదరంగం ప్రారంభమైంది. ఒక పావు కదపాలిప్పుడు మనం. మీకది ఉపయోగకరంగా ఉంటుంది..”అని ఆదేశించింది.
”యస్‌ మేడం..”
గుండెల్లో ఏదో ఉద్వేగం..ఒకని మరణశాసనం..ఒక ప్రభుత్వ పతనానికి ముహూర్తం.,
కళ్ళు మూసుకుంది..అలసటగా.
ఎదురుగా..విశాలమైన గాజుతలుపుల కారిడార్‌లోనుండి..చొచ్చుకొచ్చి నిరీక్షిస్తున్న నీలి సముద్రం. అలల ఎడతెగని చప్పుడు..లయబద్ధంగా..నిరంతరంగా.
ఆమెకర్ధమౌతోంది.. ఆమె బయట.. ఎదుట మాత్రమే కాదు.. తన లోలోపలకూడా ఒక నిశ్శబ్ద సముద్రం గర్జిస్తోందని,
టైం చూచుకుంది లీల కొద్దిసేపైన తర్వాత. రాత్రి రెండూ యాభై నిముషాలు.
ఈ దిక్కుమాలిన ప్రపంచంలో రాజకీయాల్లోగానీ, ఇతరేతర ఏ కీలక రంగాల్లోగానీ అతిప్రధానమైన నిర్ణయాలన్నీ రాత్రుళ్లే జరిగిపోతాయి. రాత్రుళ్ళు వ్యూహించుట..పగళ్ళు అమలు..ఒక రేయింబవళ్ళు వేట,
ఎందుకో ఆమెకు తన ఇష్టమైన ‘ఎర్త్‌’ బ్లూరే డివిడి చూడాలనిపించింది. లాప్‌టాప్‌లోనుండి ఎదుట ఉన్న శాంసంగ్‌ హోం థియేటర్‌ సిక్ట్సీ ఫోర్‌ ఇంచెస్‌ టి.విలోకి డిస్ని నేచర్‌ ‘ఎర్త్‌’ ఫైల్‌ను ట్రాన్స్‌ఫర్‌ చేసి ‘ప్లే’ నొక్కింది.
‘ఎర్త్‌’..అంటే..భూమి..ఫృథ్వి..
స్త్రీ.. అంటే అన్నింటినీ భరించేది..ధరించేది..ధరణేకదా., టి.వి. తెరపై విశాలంగా ఒక ఎడారి విచ్చుకుని పరుచుకుంది. ఒక ఒంటరి గ్రద్ద..విశాలంగా విప్పుకున్న రెండు రెక్కలు.. పరుగెత్తుతోంది..పైన ఆకాశం..క్రింద భూమి,
లీల అలసిపోయిన ప్రతిసారీ ఈ ‘ఎర్త్‌’ డివిడిని చూస్తుంది..చూడగానే హృదయం రీచార్జ్‌ ఔతుంది. తను పునరుత్తేజిత ఔతుంది. ఈ భూమిపై చిగురించి, ఎదిగి, ఒదిగి, వికసించి, నశించి, దహించుకుపోయి, శిథిలమై, ఒట్టి అవశేషంగా మిగిలి..స్తబ్దమై..నిర్జీవమై.
‘వలయం వలయేతి..’
చక్రం.. కాలచక్రం..ఋతుచక్రం.. జీవచక్రం..జ్ఞానచక్రం..జగమంతా ఒక అవ్యవస్థిత చక్రగమనం.. చక్రభ్రమణం,
ఏనుగు శరీరం ఎంతో పెద్దది. కళ్ళు ఎంత చిన్నవో,
పక్షి ఏదైనా..రెక్కలు రెండు..ఎంత చిన్నవో..ఈదవలసిన ఆకాశం ఎంత విశాలమైందో..
గుర్రం కాళ్ళు ఎంత సన్ననివి..కాని, దాని వేగం ఎంత ప్రచండమైంది. ఐతే జీవితమంతా పరుగే..పుట్టి భూమిపైన పడ్డ మరుక్షణం నుండి చచ్చేవరకు గుర్రం నిరంతరం రేయింబవళ్ళు ఎప్పుడూ నిలబడి ఉండడమే. అలసట ఎరగకుండా.. విధేయంగా, సహనంగా..ఎంత శిక్ష..జీవితకాల శిక్ష.
రెక్కలు మొలుస్తున్నపుడు ప్రతి పక్షీ ఎంత పులకించిపోతుంది,
పుడ్తున్నపుడు ఏ మొక్కయినా ఎంత అందంగా ఉంటుంది జీవకాంతితో.
ప్రతి జలపాతం..క్రింద పడి..పతనమై..చితికి…చింది..
ఒక జింకను ఒక పులి వేటాడ్తోంది.. ఆకలిగా, కసిగా, దీక్షగా..తెరపై .,
ఆ క్షణం ముందు పులి పొడ జింకకు తెలియదు.. జింక ఉనికి పులికి తెలియదు..ఒకదానికి మరొకటి తటస్థపడగానే.. ఆత్మరక్షణ..వేట..వేటాడబడ్డం.,
భూమ్మీది ఈ సకల చరాచర జీవరాశులన్నీ జీవించడానికి పోరాడ్తూనే, ఆత్మరక్షణ కోసం వ్యూహాత్మకంగా బ్రతుకంతా యుద్ధం చేస్తున్నాయి..కదా.
యుద్ధం..యుద్ధం..జీవితమంటే..యు
ఎవరితో..?
సముద్రాలు..ఎడారులు..అడవులు..
అంతా ఏనాడూ ఎవరికీ అర్ధంకాని ఒక వ్యవస్థ..ఒక పాఠం..ఒక సజీవ బోధన..అంతా ఉండి చివరికి ఏదీ ఉండదని నిరంతరం ఒక సత్యాన్ని ప్రవచించే ప్రజ్వలిత చేతన.,
లీల మనసునిండా ఒక ఛాయామాత్రంగా సమస్త సృష్టి.. క్రమంగా వ్యాపించి..అల్లుకుపోతూ..ఎక్కడో తెలిపోతూ.,
గాలి కనబడ్తుందా..?ప్రశ్న.
కనబడదు కాబట్టి గాలిలేనట్టు కాదుగదా.
కనబడనివన్నీ లేనట్టా.. కనబడేవన్నీ ఉన్నట్టా..,ప్రతి మనిషికీ తెలిసే ‘ఆకలి’ ఉన్నట్టా లేనట్టా.
ఎందుకో ఆమె హృదయపు లోపొరల్లో అన్నమయ్య కీర్తన కదిలి సన్నగా వినిపించడం మొదలైంది.
‘అంతర్యామీ..అలసితి..సొలసితి..’
లీల కళ్ళు మూసుకుంది.
ఎందుకో ఆమె కళ్ళనిండా నీళ్ళు నిండి..దుఃఖం పొంగి పొంగి,
అప్పుడామె తీరాన్ని చేరబోతున్న సముద్రపుటలలా..కల్లోలంగా ఉంది.
(సశేషం)
తాజా కామెంట్లు