మబ్బుల చాటున మహాతార : తొషిరో  మైఫ్యున్  

 

నక్షత్రం  వేణుగోపాల్

తెలుగు చలన చిత్ర చరిత్రలో బాపు రమణల కాంబినేషన్ కి ఒక ప్రత్యేకత , అలాగే  హాలివుడ్ లో డైరెక్టర్  జాన్ ఫోర్డ్ , నటుడు జాన్ వేన్ కలసి 21  సినిమాల్లో  నటించడం ఒక పెద్ద రికార్డు , అయితే,  అలాంటి ఇంకొక కాంబినేషన్    ప్రపంచ ప్రఖ్యాతిగాంచిన  బ్లాక్ బస్టర్ సినిమాలతో  ఒకప్పుడు హోలీవుడ్ని జపాన్ సినిమా వైపుకి తిప్పుకునేట్టు చేసిన ప్రముఖ డైరెక్టర్, ఆయన సినిమాల్లో నటించిన  ఒక ప్రముఖ నటుడు , ప్రపంచ చలన  చిత్ర చరిత్రలో కలకాలం  నిలిచి పోయే  ఆణిముత్యాలు లాంటి  ఎన్నో హిట్లు ఇచ్చిన  ఈ ఇద్దరి  కాంబినేషన్ లో డైరెక్టర్ అందరికీ తెలుసు  కాని  అంతగా వెలుగు చూడని ఆ నటున్ని పరిచయం చేయడం కోసమే ఈ వ్యాసం  .

ఎక్కడో జపాన్ మారు మూల ప్రాంతంలో పుట్టి , ప్రపంచ చలన చిత్ర రంగంలో ,  చిరకాలం నిలిఛి పోయిన   డైరెక్టర్ అకిరా కురుసోవా . ఆయనను   డైరెక్టర్ లకే  డైరెక్టర్ అంటారు . ఒక ప్రఖ్యాత టాలీవుడ్ హీరో ఆయన కోడుకుకి అకిరా అని  పేరు కలిసి వచ్చేట్టు కూడా నామకరణం చేయడం కూడా జరిగింది అంటే ఆ డైరెక్టర్ కి ఉన్న ఖ్యాతి, పాపులారిటీ   ఎంతటిదో అర్థం చేసు కోవచ్చు.   ఎంతో పేరు ప్రఖ్యాతులు, ఎన్నో ఆస్కార్  అవార్డులు పొందిన ఆ డైరెక్టర్ కి పేరు రావడం వెనుక ఇంకొక నటుని కృషి కూడా లేక పోలేదు.  ఎందుకంటే   1948 – 1965 మధ్య కురోసోవా  తీసిన 17 సినిమాల్లో ఒక్కటి మినహా  16 సినిమాల్లో  ఆ నటుడే అన్ని ప్రాముఖ్యత గల పాత్రల్ని పోషించాడు అనే విషయమే   నా వ్యాఖ్యలకి బలము చేకూర్చుతాయి .   అందులో ఎన్నో చిత్రాలు హాలివుడ్ లో  బ్లాకు  బస్టర్  హిట్సే . అన్ని హిట్స్ అందించిన ఆ నటుని గురించి చాల మందికి  తెలియక పోవడం కొంచం విస్మయం కలిగించింది .

కురొసొవా సినిమాలు ” త్రోన్ అఫ్ బ్లడ్ “, “యోజింబో”  ,”సెవన్ సమురై, “రోషోమాన్” ,”రెడ్ బియర్డ్”, “లోయర్ డెప్థ్స్” ,” హై  అండ్ లో”  లాంటి చిత్రాలు చూస్తున్నప్పుడు అన్ని సినిమాల్లో ఆ నటుని నటన  నన్ను అమితంగా ఆకర్షించినది.   ఆ నటున్ని గురించి తెలుసు   కోవాలనే ఉత్సాహం మొదలయింది , ఎందుకు ఈ నటుడే ప్రతి సినిమాలో , ప్రతి చిత్రం లో వైవిధ్య మైన  పాత్ర ద్వారా ముందు కోస్తున్నాడు, ఎందుకు కురుసోవా ఆ నటున్నే తీసుకోవాల్సి వచ్చింది  అనే కుతూహలమే  నన్ను ఈ రోజు వ్యాసం రాసేట్టు చేసింది .    నేను చేసిన ఒక చిన్న పరిశోధన వల్ల  ఆ  నటుని   గురించి తెలుసుకున్న  ఎన్నో అబ్బుర పడే విషయాలు మీతో పంచుకోవాలనుకుంటున్నాను . ఇంతకీ ఆ నటుడు  ఎవరో కాదు , ఆయన పేరే “తొషిరో మైఫ్యూన్ ”  Toshiro Mifune.     అసలు ఆయన నటుడు కావాలనే అనుకోలేదు ,  ఎప్పుడూ ప్రయతించ లేదు కూడా  . ఆయన సినీ రంగ ప్రవేశమే చాల విచిత్రంగా జరిగింది.  ప్రస్తుత నటులు, కాబోయే నటులు తొషిరో మైఫ్యూన్  నటజీవితం నుండి నేర్చుకోవాల్సిన విషయాలు ఎన్నో వున్నాయి .

IMG_7797

అది సెప్టెంబరు 1945, రెండవ ప్రపంచ యుద్ధం తో బాంబుల దాడికి రక్త సిక్త మయిన జపాన్ గాయాలతో సత మవుతూంది . తొషిరో  మైఫ్యూన్ తల్లి దండ్రులు క్రిష్టియన్ ప్రచారకులు, చైనా కు సమీపంలో వుండే మంచూరియాలో వాళ్ళ  కుటుంబం స్తిర పడింది , అయితే తొషిరో  మైఫ్యూన్  జపాన్  జాతీయుడు కాబట్టి తప్పని సరిగా జపాన్ సైన్యం లో చేరాల్సొచ్చింది .   తండ్రి వద్ద నేర్చుకున్న ఫోటోగ్రఫి అనుభవంతో యుద్ధంలో విమానం నుండి ఫోటోలు తీసే వుద్యోగం .    అప్పుడు ఆయనకు సుమారుగా 25 సంవత్సరాల వయసు వుంటుంది ,  యుద్ధంలో  ఓడిపోయిన   వాయు దళం నుండి గెంటి వెయబడ్డాడు.      తల్లి తండ్రులు యుద్ధంలో మరణించారు .   ఎవరూ తెలిసిన వారు లేరు, తెలిసిన బందువులు ఎవరూ లేరు.  కొత్త  ప్రాంతం, తన స్వంత దేశం లోనే పరాయి వాడు అయ్యాడు. తిరిగి ఇంటికి తీసుకెళ్లడానికి ఎవరూ లేరు.  ఇప్పుడు అతని పరిస్థితి ఏమిటి?
ఇదంతా వింటుంటే  ఒక సినిమా కథ లాగే వుంటుంది కదూ!  ఇలాంటి  కథల్లోని పాత్రలలో  వెండి తెరపై జీవించి , ప్రపంచం లోని ఎన్నో గొప్ప అవార్డులని తన చిత్రాల వైపుకి తిప్పుకున్న ఒక సామన్యుని  జీవితంలో జరిగిన యదార్థ గాధ .

ఇప్పుడు తన ముందుంది ఒకటే మార్గం .  తండ్రి ఫోటో స్టూడియోలో నేర్చుకొన్న కొద్ది పాటి ఫోటోగ్రఫి ,  అదీ టోక్యో మహా నగరంలో  అయితేనే  సాధ్యం అని నిర్ణయించుకుని , బాంబుల దాడిలో ధ్వంసం అయిన బూడిదగా మారిన భవంతులు, శ్మశానాన్ని తలపిస్తున్న , రక్త సిక్తమయిన నిర్మానుష్యమైన  వీధుల గుండా , తిండి లేక, నిద్ర లేక జేబులో చిల్లి గవ్వ లేకుండా ఎన్నో పగలు రాత్రులు, నడిచి నగరానికి చేరుకున్నాడు .  తనతో పాటు యుద్ధంలో పని చేసిన ఒక  మిత్రుడు కన పడితే ,సహాయం ఆర్జించి, ఆశయ్రం  పొంద గలిగాడు కానీ ఫోటోగ్రఫీ ఒక కల అని మాత్రమే అర్థమయ్యింది , ఎందుకంటే  అక్కడ ఫోటోలు తీయించుకోవడానికి ఎవ్వరూ సిద్ధంగా లేరు, బూడిద శవాలు, గుట్టలు తప్ప .   ఆ తర్వాత మరో వ్యక్తి ద్వారా, ఒక ఫిలిం స్టుడియోలో కెమెరా మెన్ కి సహాయకుడి వుద్యోగం వుందని తెలిసి ధరఖాస్తు చేసుకున్నాడు, కాని ఆ వుద్యోగం వస్తుందని ఏ మాత్రం నమ్మకం గాని, ఆశ గానీ లేదు.

అలా ఎన్నో ధరఖాస్తు లు, ప్రయత్నాలు జరుగుతూనే వున్నాయి,  కానీ అన్ని ధరఖాస్తు లు గోడకు కొట్టిన పిడికల్లా ఆటే అతుక్కు పోయాయి  కానీ  ఒక్క ధరఖాస్తు నుండి కూడా పిలుపు రాలేదు, ఆ తర్వాత సరిగ్గా ఒక నెల రోజుల తర్వాత ఒక స్టూడియో నుండి ఉత్తరం వచ్చింది, ఇక ఏ మాత్రం ఆలస్యం చేయకుండా  ఎంతో ఆశగా వెళ్ళాడు. కానీ అప్పటికే అక్కడ వంద లాది మంది వేచి చూస్తున్నారు . వారందరినీ చూడగానే వున్నా ఆశ కాస్త నీరు గారి పోయింది . పిలుపు కోసం వేచి చూడగా చూడగా లోపలి నుండి పిలుపు రానే వచ్చింది .   అక్కడ నల్గురు పెద్ద మనుషులు ఇంటర్వూ చేయడానికి సిద్దంగా వున్నారు .

గదిలోకి అడుగు పెట్టగానే   ఇంటర్వూ బోర్డు సభ్యుడొకడు  “నవ్వు” అన్నాడు .  నవ్వ డానికి  కాదు,  నేను  ఉద్యోగం కోసం వచ్చానని వారికీ అసహనంగా చెప్పాడు.  నీకు వుద్యోగం రావాలంటే నీవు నవ్వాల్సిందే ! కటువు గా అన్నాడు ఇంకొక ఇంటర్వూ మెంబరు .   వూరికే నవ్వు మంటే ఎలా నవ్వను?.. కొంచెం కోపంగా , ధైర్యంగానే చెప్పాడు .   ఇతనికి అర్థం అయ్యిందేమంటే , వాళ్ళు తనని మూర్ఖున్ని చేసి ఆడు కుంటున్నారు అని పించింది .  ఇంటర్వ్యూ బోర్డు మెంబర్లకి అసహనంగా వుంది .  నవ్వు మంటే నవ్వడు , వారి సమయాన్ని వృధా చేస్తున్నాడనిపించి, అతని ధరఖాస్తుని  తిరిస్కరించారు. కాని ఈ తతంగాన్ని పక్కగది నుంచి    చూస్తున్న ఒక పెద్ద మనిషి తిరిగి పిలిపించాడు.   ఇప్పుడు తాగు బోతుగా నటించమన్నాడు . అప్పుడు  ఆయనకు చిర్రెత్తు కొచ్చింది , కోపం తారా స్తాయికి చేరింది .  ఇంకా వారు తనని మూర్ఖున్ని చేసి తనతో ఆడు కుంటున్నారనిపించింది .

IMG_7795

తను ఇక్కడికి నటుడవ్వాలని  రాలేదు,  కెమరా మెన్  వుద్యోగం  కోసం వచ్చానని చెపాడు .  అయినా  ఆ పెద్ద మనిషి వినకుండా తాగుబోతూ లా నటించాల్సిందే ,  అంటూ పక్క గదిలో వున్న ఇంకొక వ్యక్తిని పిలిచాడు. ఇంకే మార్గము లేదు , అక్కడి నుండి బయట పడాలంటే ఏదో త్రాగు బోతు లా చేయాల్సిందేనని నిర్ణ యించుకొని , అక్కడి కుర్చీలు విసురుతూ, ఉరిమి ఉరిమి చూస్తూ , పిచ్చి అరుపులతో కొంచెం సేపు గందర గోళం     సృష్టించాడు .   హమ్మయ్య , ఒక  భారం దిగింది  అని  కనీసం జడ్జీల  మొహం వైపు కూడా చూడకుండా వెనుతిరిగి  పోతున్న  ఆయనకు ఆ గది కరతాళ ధ్వనులతో మారు మ్రోగడంతో బయటకు పెట్టబోతున్న కాలు అక్కడే ఆగి పోయింది .    ” యు ఆర్  సెలెక్టెడ్ ”  అని భుజం పై  ఆ పెద్ద మనిషి చేయి పడింది . ఆశ్చర్య పడడం తొషిరో మైఫ్యూన్ వంతు అయ్యింది .
ఆ పెద్ద మనిషి ఎవరో కాదు, యుద్ధం, యుద్ధ యోధుడు  ( సమురాయ్ ) నేపధ్యం లో నిర్మించబడ్డ ఎన్నో చిత్రాలకు దర్శకత్వం వహించిన  ప్రముఖ డైరెక్టర్   కజిరో యమమోటో (Kajiro Yamamoto).  పక్క గదిలో వున్నఇంకొక వ్యక్తే – అకిరా కురుసోవా .  తొషిరో మైఫ్యూన్ లో దాగి ఉన్న నటన ప్రతిభని  గుర్తించిన ప్రముఖ డైరెక్టర్   కజిరో యమమోటో,     అకిరా కురో సోవా సినిమా కోసం  జరుగుతున్న  16 మందిలో ఒకరిగా తొషిరో   మైఫ్యూన్ ని  సెలెక్ట్    చేయడమే కాక ,  ఇంకొక ప్రముఖ డైరెక్టర్  “సెంకిచి తనిగుచ్చి”(Senkichi Taniguchi ) కి పరిచయం చేస్తే ” సెంకిచి తనిగుచ్చి” దర్శకత్వం వహించ బోతున్న ” సిన్ బాకా జిదాయి ( జెన్) ”   అనే చిత్రం లో ఒక ప్రాముఖ్యం  గల పాత్రని అప్పటికప్పుడు ఇవ్వడం జరిగింది .   ఆ స్టూడియో నే ప్రపంచ  ప్రఖ్యాతిగాంచిన ఎన్నో చిత్రాలు నిర్మించ బడ్డ    “తోహో ” స్టూడియో .

ఇంతకీ జరిగిందేమంటే   నటీనటుల కోసం  జరుగుతున్న కమిటీకి , తొషిరో మైఫ్యూన్  కు తెలియ కుండా ఆయన ఫ్రెండ్   ధరఖాస్తు ని పంపాడు. కాని ఆ విషయం  తొషిరో మైఫ్యూన్  కి చెప్పలేదు . తొషిరో మైఫ్యూన్ కెమరా మెన్ వుద్యోగం కోసమని వచ్చాడు .   కురుసోవా సినిమా కోసం చూస్తున్న 16 నటుల కోసం జరిగిన పోటీల్లో వచ్చిన మొత్తం  4000 మందిలో  తొషిరో మైఫ్యూన్ ఒక నటుడిగా  సెలెక్ట్ కావడమే కాకుండా అప్పటికప్పుడు  కురుసొవా  తన తీయబోయే  ఇంకొక సినిమా లో  ప్రధాన పాత్రకి  ఎంపిక చేసుకున్నాడు .    ఎంపిక రోజునే మొత్తం మూడు పాత్రలు దక్కించుకున్న ఘనత కూడా  తొషిరో మైఫ్యూన్ కి దక్కింది.   కురుసొవా  సాధారణంగా ఈ నటున్ని పొగడడు  కానీ , మొదట గా , చివరగా పొగిడిన ఒకే ఒక నటుడు తొషిరో మైఫ్యూన్

అలా అనుకోకుండా  నటుడు అయిన  తొషిరో మైఫ్యూన్ నట ప్రస్థానం  అంచెలంచెలుగా ఎదుగుతూ  వచ్చింది . 1953 లో విడుదల అయిన “రోషోమన్” వెనిస్ ఫిలిం ఫెస్టివల్లో  ఉత్తమ చిత్రంగా ఎన్నికైనప్పుడు  ప్రపంచ  సినిమా ఒక్కసారి తొషిరో మైఫ్యూన్  యొక్క అద్భుత నటనని  గుర్తించింది .    ఒక యోధుడు  (సమురాయ్ ) అంటే ఏమిటో ఎలా  ఉండాలో కురోసోవా ప్రపంచానికి చాటి చెప్పాడు .  అంతటితో ఆగ కుండా, గోల్డెన్ లైన్ , విదేశీ క్యాటగిరీ లో ఆస్కార్ అవార్డు ని కూడా  ఈ సినిమా దక్కించుకుంది .
డ్రంకెన్ ఎంగెల్  (1948 ) కురుసోవా  మొట్ట మొదటి సారిగా  తొషిరో మైఫ్యూన్ ని ప్రముఖ నటుల మధ్య  హీరో గా నిలబెట్టి నపుడు , జపాన్ సినిమా ముక్కున వేలేసు కుంది .

బ్లాక్ బస్టర్ సినిమా  సెవెన్ సమురాయ్ (1954) లో ఒక యోధునిగా తనను తను ఊహించుకుంటూ ఎన్నో కలలు కనే ఒక యువకుడి పాత్రలో జీవించాడు  నవ్వించాడు తొషిరో మైఫ్యూన్ .  The Magnificent Seven లాంటి డైరెక్ట్ హాలీవుడ్ మూవీనే  కాక ఇంకా ఇన్నో హాలివుడ్ చిత్రాలకి సెవెన్ సమురాయ్ ప్రేరణ . అల్ టైం రికార్డ్ సాధించిన బాలీవుడ్ చిత్రం “షోలే ”  సెవెన్ సమురాయ్  చిత్రం యొక్క స్ఫూర్తి తోనే నిర్మించ బడింది.

సెవెన్ సమురాయ్ – రెండు  అకాడమీ అవార్డులకి నామినేట్  అవడమే కాకుండా, బ్రిటిష్ అకాడెమి ఫిలిం అవార్డుకి  (ఉత్తమ చిత్రం, ఉత్తమ విదేశీ నటుడు క్యాటగిరి లో    తొషిరో మైఫ్యూన్ , టకాషి షిమురా  నామినేట్ కాబడ్దారు .
” త్రోన్ అఫ్ బ్లడ్ ‘   1957  వెనిస్ ఫిలిం ఫెస్టివల్ లో కురుసోవ కి గోల్డెన్ లయన్ అవార్డు కి నామినేట్  కావడమే కాక , తొషిరో మైఫ్యూన్  కి ఉత్తమ నటుడిగా  మైనిచి ఫిలిం ఫెస్టివల్ మరియు  కినేమ జున్పో ఫిలిం ఫెస్టివల్ లో అవార్డు లభించింది .
వెనిస్ ఫిలిం ఫెస్టివల్ లో సిల్వర్ లైన్ అవార్డు గెలుచు   కోవడమే కాకుండా , గోల్డెన్ లైన్  కి  నామినేట్ కాబడ్డది . ఇవే కాకుండా ఇంకా చాలా  అవార్డులని ఈ చిత్రం సొంతం చేసుకుంది

1958 లో “The Hidden Fortress”  తొషిరో మైఫ్యూన్   నటించిన ఈ సమూరాయ్ చిత్రం ఇంటర్నేషనల్ క్రిటిక్స్ ప్రైజ్,  బెర్లిన్ ఇంటర్ నేషనల్ ఫిలిం ఫెస్టివల్ లో “సిల్వర్ బేర్” ఫర్ బెస్ట్ డైరెక్టర్ అవార్డుని నోచుకుంది .

“The Bad Sleep Well” 1960 లో నిర్మించబడ్డ  ఈ చిత్రంతో కురుసోవా  నిర్మాతగా మారాడు .   షేక్స్పియర్ “హామ్లెట్ ” ను తల పించే ఈ చిత్రం  సమురాయ్ చిత్రాలకి భిన్నంగా , కార్పొరేట్ లలో జర్గుతున్న అవినీతి ఆధారంగా నిర్మించ బడింది .  ఇందులో కంపనీ ప్రెసిడెంట్ కి సెక్రెటరిగా  తొషిరో మైఫ్యూన్  నటించాడు.  11 వ బెర్లిన్  అంతర్జాతీయ ఫిలిం ఫెస్టివల్లో ఉత్తమ  డైరెక్టర్   ‘గోల్డెన్ బెర్లిన్ బేర్ ” అవార్డు కి కురుసొవా నామినేట్  కాబడ్డాడు .  మాక్సిం గోర్కీ నవల ఆధారంగా కురుసొవా   స్వంతం ప్రొడక్షన్ బ్యానర్ లో నిర్మించ బడ్డ చిత్రం  “ది లోయర్  డెప్త్స్ ” ప్రపంచ వ్యాప్తంగా  విమర్శల దృష్టిని ఆకర్షించింది.

“యోజింబో”  1961 లో వచ్చిన ఈ చిత్రంలో నటనకు   వెనిస్ ఫిలిం ఫెస్టివల్  తొషిరో మైఫ్యూన్  కి ఉత్తమ నటుడి అవార్డుని ప్రకటించింది .  కురుసోవా కి గోల్డెన్ లయన్ అవార్డుని తెచ్చి పెట్టింది . ఇక్కడ  ప్రస్తావిస్తున్న అవార్డులలో  చాలా వరకు   ప్రపంచ వ్యాప్తంగా పేరు గాంచినవే . ఇవే కాక ఇంకా జపాన్ లో చాల అవార్డులు చేసు కున్నారు కురుసోవా   మరియు తొషిరో మైఫ్యూన్ .
” రెడ్ బియర్డ్ ” 1965 కురుసోవా ,  తొషిరో మైఫ్యూన్ ల కాంబినేషన్ లో వచ్చిన చివరి చిత్రం ( 16వ ) .  ఈ చిత్రం కోసం  తొషిరో మైఫ్యూన్  ని గడ్డంపెంచు మని చెప్పడం , షూటింగ్ అనుకున్న దాని  కంటే ఎక్కువ సమయం పట్టడంవళ్ళ   సహజంగా పెంచిన గడ్డం తీయలేక, కొత్త సినిమా లను అంగీకరించ లేక    కల్గిన  ఆర్థిక  సమస్యల  ప్రభావం  ఆయన నటన పై కూడా  పడింది .  స్క్రిప్ట్ రైటర్  Hideo Oguni   రాసిన ఒక  పుస్తకంలో  , ఈ సినిమాలో  తొషిరో మైఫ్యూన్ నటన చాల తప్పుల తడక సాగింది  అన్న ఒక్క వ్యాఖ్య కురుసోవా ,  తొషిరో మైఫ్యూన్ ల మధ్య మనస్పర్ధలకు కారణం అవడమే కాకుండా సినిమాతో వున్న  వారిద్దరి అనుబంధానికి   శాశ్వతంగా తెర  పడింది .  ఆ తర్వాత వారిద్దరూ కలిసి  ఎప్పుడూనటించ లేదు .
కురొసొవా తోనే తొషిరో మైఫ్యూన్  కి ఖ్యాతి వచ్చింది అనే వాదనను త్రోసి పుచ్చుతూ ఆ తర్వాత  తొషిరో మైఫ్యూన్   కూడా నిర్మాత మారి తన స్వంత బ్యానర్లో  డజను చిత్రాల వరకూ నిర్మించాడు.   “సమురాయ్ రెబిలియన్” , అనే చిత్రం మసాకి కొబయాషి దర్శకత్వం వహించిన ఈ చిత్రం 1967 లో ఉత్తమ జపాన్ చిత్రంగా ఎన్నికవ్వడమే కాక,   అంతర్జీతీయ మార్కెట్ లో మంచి పేరు, డబ్బు సంపాదించింది పెట్టింది .  వెనిస్ ఫిలిం ఫెస్టివల్ లో ఉత్తమ డైరెక్టర్ అవార్డు,  నినేమ జున్పో వార్డు ( బెస్ట్ డైరెక్టర్), బెస్ట్ ఫిలిం , బెస్ట్ స్క్రీన్ప్లే , మైనిచి ఫిలిం కాంకోర్స్ ఫెస్టివల్ లో బెస్ట్ ఫిలిం  అవార్డు స్వంతం చేసుకుంది .

1979  లో వచ్చిన స్టీవెన్ స్పీల్ బర్గ్  హాలీవుడ్ చిత్రం “1941” లో నావికాదళంలో  సబ్ మెరైన్ లతో బాంబులు కురిపించే కెప్టెన్ పాత్రలో  అమెరికన్   ప్రేక్షకులని తన అధ్బుత నటనతో అబ్బురపరిచాడు .  ఆ తర్వాత, జేమ్స్ క్లావేన్స్ నిర్మించిన  “షోగన్”  చిత్రం  TV సీరియల్ “తోరినాగా” పాత్ర ద్వారా  అమెరికన్ ప్రేక్షక హృదయాల్లో చిర స్తాయిగా నిలిచి పోయాడు,  ఆ కాలంలో  అత్యదిక రేటింగు సంపాదించుకున్న సీరియల్  షోగన్.

తొషిరో మైఫ్యూన్ నటించిన 130 చిత్రాల్లో సగానికి పైగా  ‘ సమురాయ్  ‘ పాత్రల్లో జీవించి , తెలుగు సినిమాలో కృష్ణుడు , రాముడు  అంటే , మహా నటుడు ఎన్టీఆర్  గుర్తుకు  వచ్చినట్టు , ప్రపంచ  ప్రేక్షకులకు ఒక యోధుడు అంటే   తొషిరో మైఫ్యూన్ లాగ వుండాలి అని ఎందరి హ్రుదయాల్లోనో చెరగని ముద్ర వేసాడు .  ఇలా చెప్పుకుంటూ పోతే తను నటించిన  ప్రతిచిత్రం ఒక ప్రత్యేకతను సంతరించుకున్నదే .  అన్నిట్లో హీరోనే కాకుండా , ప్రాముఖ్యత వున్న నెగటివ్ షెడ్స్  రోల్స్ లోనూ నటించి పేరు తెచ్చుకున్నాడు . మల్టీ స్టారర్ మూవీస్ లోనూ నటించాడు . కొన్ని సందర్భాల్లో ,  ప్రసిద్ధ తెలుగు నటుడు  ఎస్వీ రంగారావు గారిని  తలపించే  పౌరుషం, రౌద్రం , సున్నిత హాస్యం ఇలా  ఏ పాత్ర లోనయినా  ఇమిడి పోయే    లక్షణాలు  తొషిరో మైఫ్యూన్  లో చాల వున్నాయి .
అసలు “హీరో-హీరొయిన్ ”  అనే  పదాలు  మన తెలుగు సినీ పరిశ్రమ పెంచి పోషించిన ఒక  చెడు సంప్రదాయం , ఈ పదాలు ఏ ఇతర బాషలలో కూడా ఎక్కువ గా కనిపించవు .  హాలివుడ్ సినిమాల్లో కూడా ఈ పదాలు ఎప్పుడో కాని, వినిపించవు, కానీ ఉత్తమ నటుడు, ఉత్తమ నటి అని మాత్రమే వినిపిస్తుంది. కేవలం హీరొ  పాత్రలే కాకుండా  ఎలాంటి పాత్రనయినా నటించి మెప్పించిన వాడే నటుడు అంటాడు తొషిరో మైఫ్యూన్.  కురుసోవా  మరణానికి కొన్ని నెలల ముందు డిసెంబర్ 24, 1997న   , అల్జమైర్ వ్యాధితో   తుది  శ్వాశ  వదిలాడు తొషిరో మైఫ్యూన్.

సినీ రచయితలు  హీరో చుట్టూ కథలు అల్లకుండా , కథ కోసం  మంచి నటులని  ప్రోత్సహిస్తే , తెలుగులో మరిన్ని మంచి చిత్రాలు, మరింత మంది మంచి నటులు వచ్చే అవకాశం వుంది . తెలుగు సినీ పరిశ్రమ ,  ముఖ్యంగా హీరో కావాలనో, హీరోయిన్ కావాలనో  స్టూడియోల చుట్టూ  తిరుగుతున్న కొత్త నటులు తొషిరో మైఫ్యూన్  సినిమాల నుండి, ఆయన నటన నుండి  నేర్చుకోవాల్సింది చాలావుంది .

*