–బమ్మిడి జగదీశ్వరరావు
మా యింట్లో అందరూ
పుణ్యాత్ములే!
మేం పుష్కర స్నానాలు చేసాం!
***
పాపాల్ని గోదాట్లో
వదిలేసాం!
పాపం చేపలు యేమవుతాయో ఏమో?
***
పిండాలు పెట్టేశాం!
పెద్దలకీ
నదికీ
***
ఓకే.. లైట్స్ ఆన్..
స్టార్ట్.. కెమేరా.. యాక్షన్..
కట్ చేస్తే- యిరవయ్యేడుగురు!
***
కొందరు మనుషులకీ
కొన్ని యిల్లకీ
శవాలే తీర్థ ప్రసాదాలు!
***
మూడే మునకలు
మూడే నిముషాలు
అయినా యింట్లో యీకోలీ సంగీత కచేరీలు!
***
గోదారి నీళ్ళు
పరమపదసో’పానం’
సేవిస్తే వైకుంఠవాసం!
***
పుణ్యం ప్రజలకి
ప్రచారం ప్రభుత్వానికి
స్వచ్ఛ భారత్ గోదావరికి!
***
గోదావరి పొర్లి పొర్లి యేడుస్తోంది!
ఉన్నప్పుడు ఊసే లేదు!
చచ్చాక పిండ ప్రదానం!
***
పాప ప్రక్షాళనకీ నదీ ప్రక్షాళనకీ
యెన్ని పుష్కరాలు పడుతుందో?
ప్రభుత్వ ప్రక్షాలనకి!
***
గౌతమ మహామునికి కూడా తెలీదు
మాయ గోవు మర్మం!
గోదావరి జలాల పంపకం!
***
త్రయంబకం బంగాళాఖాతాల మధ్య
ప్రవహించేది గోదావరి కాదు!
జన జీవిత రహదారి!
****
ప్రజలవద్దకు పాలన!
ప్రజలవద్దకు పుష్కరం!
గోదావరి జలమిప్పుడు ‘గాడ్ జల్’!
***
తాగేనీళ్ళు సరే, తల మీద నీళ్ళూ
బాటిల్ పాతిక!
పోస్టాఫీసులో ప్రవహిస్తోంది గోదావరి!
***
అందరూ సమానులే
దేవునికీ ప్రజాస్వామ్యానికీ!
మంత్రులూ విఐపీలూ కొద్దిగా యెక్కువ సమానం!
***
అటు ఆరొందల కోట్లు
యిటు పదహారొందల కోట్లు
ఆనకట్టల కన్న స్నాన ఘట్టాలే మిన్న!
***
కృత్య దేవతల్నితిన్నదో లేదో
అకృత్యమైపోయింది ఆథ్యాత్మికం
నదిని మింగిన మనుషులొచ్చారు!
***
గాయపడ్డ గోదారి
క్రిష్ణమ్మతో పలికింది
యిక నీవంతే జాగ్రత్త సుమీ అని!*
జనం లో మెప్పు — నమ్మకం — గుర్తింపు కోసం —-రొండు తెలుగు రాష్ట్రాల ముఖ్యమంత్రులు —
పోటి గా — అక్కరకు రా ని ఖర్చులు —
ఏలుతుంది రాజులు — మల్లి దొరల పాలన ????
అంతా రాజకియెం
రావు గారు భాగుంది sir….
————————————–బుచ్చి రెడ్డి గంగుల ————————-
True లైన్స్. నైస్
చాలా చాలా బావుంది గురువు గారూ
Sujatha.సి
Bammidi baga rastadu.