16న అనంతపురంలో ‘జ్ఞానసింధు’ సర్దేశాయి తిరుమలరావు గ్రంథావిష్కరణ!

Sardesai Cover Page front

స్పందన” అనంత కవుల వేదిక ఆధ్వర్యంలో “జ్ఞానసింధు సర్దేశాయి తిరుమలరావు” పుస్తకావిష్కరణ.

తేదీ: 16, జూన్ 2013, ఆదివారం
సమయం: ఉదయం  10:20
వేదిక: ఎన్.జి.వో. హోం, అనంతపురం

‘ఇలాంటి వ్యక్తి ఈ భూమ్మీద నడయాడాడంటే భావితరాలకు నమ్మకం కుదరదు’ అని మహాత్మాగాంధి గురించి వ్యాఖ్యానిస్తూ ప్రఖ్యాత శాస్త్రవేత్త ఐన్స్టీన్ అన్నాడు. సర్దేశాయి తిరుమలరావు గారి గురించి తెలుసుకుంటుంటే కూడా మనసులోఇదే ఆలోచన మెదలుతుంది. నిజంగా, ఇలాంటి వ్యక్తి ఈ భూమి మీద ముఖ్యంగా, మన ఆంధ్రప్రదేశ్‌లో, ఇంకా ముఖ్యంగా ‘రాయలసీమలో’జీవించాడన్న ఆలోచన ఎంతో అద్భుతం అనిపిస్తుంది. సాధారణంగా ప్రతి వ్యక్తి ఓ సముద్రం లాంటివాడు.

సర్దేశాయి తిరుమలరావుగారు సప్తసముద్రాల సమ్మిశ్రమ మహాసముద్రంలాంటివాడు.అలాంటి మహాసముద్రాన్ని ఆయన చేసిన కొన్ని రచనల ఆధారంగా సముద్రాన్ని నీటిచుక్కలో చూపించే ప్రయత్నం చేసినట్టు చేస్తున్నాము. మా ప్రయత్నం అసంపూర్ణం, అసమగ్రం. ఆ మహోన్నత వ్యక్తిత్వ విశ్వరూపాన్ని సంపూర్ణంగా ప్రదర్శించలేదనటంలో ఎలాంటి సందేహం లేదు. కానీ అటు సాహిత్య ప్రపంచంలోనూ,ఇటు వైజ్ఞానిక ప్రపంచంలోనూ, ఇటు సామాజిక చరిత్రలోనూ మఱుగున పడిన ఒక మహాత్ముడికి ఈ పుస్తకం పరిచయ పుస్తకం లాంటిది మాత్రమే. ఆ మహోన్నత వ్యక్తిత్వానికి కృతజ్ఞతాపూర్వకంగా మేము సమర్పిస్తున్న ‘అంజలి’ లాంటిది మాత్రమే. ఇలాంటి అత్యున్నత వ్యక్తులకాలవాలం మన భూమి అని ఇలాంటి మహాద్భుతమైన వ్యక్తిత్వాలకు వారసులం మనమని భావితరాలకు తెలియజేయాలన్న మా ప్రయత్నంలో భాగమే ఈ పుస్తకం.

మా ఈ ప్రయత్నాన్ని సహృదయంతో అర్థం చేసుకుని స్వీకరిస్తారని ఆశిస్తున్నాము. ఇందులో దోషాలు, లోపాలకు మేమే బాధ్యులం. అయితే మన రాష్ట్రంలో పలు ప్రాంతాల్లో ఇలాంటి మహనీయులు జీవించారు. తమ మేధతో విశిష్టమైన వ్యక్తిత్వంతో సమాజాన్ని సుసంపన్నం చేశారు. కాని వారు వ్యక్తిగత ప్రచారానికి ప్రాధాన్యం ఇవ్వకపోవడంతో విస్మరింపబడ్డారు. అలాంటి మట్టిలో కలిసిన మణులను వెలికితీసి భావితరాలకోసం సమాజానికి పరిచయం చేయాల్సిన బాధ్యత మన అందరిపై ఉంది. తన పూర్వీకులను గౌరవించలేని
సమాజానికీ, తన గతాన్ని విస్మరించిన సమాజానికీ భవిష్యత్తు లేదంటారు. అలాంటి ఘోరమైన అంధకారాన్నుంచి తప్పించుకోవాలని ప్రయత్నించడం మన బాధ్యత. ఆ
బాధ్యత నిర్వహించాలనే మా ప్రయత్నంలో భాగం ఈ పుస్తకం. ఈ పుస్తకం చదివిన తరువాత ఎవరికైన సర్దేశాయి తిరుమలరావు గారిపై ఆసక్తి కలిగినా, తమ
ప్రాంతంలో విస్మృతిలో పడిన మాణిక్యాలను ప్రపంచానికి ప్రదర్శించాలన్న తపన కలిగినా మా ప్రయత్నం విజయవంతమని భావిస్తాం.

జ్ఞానసింధు సర్దేశాయి తిరుమలరావు పుస్తకంలోని ప్రకాశకుల మనవి ఇది.

ఈ పుస్తకం అన్ని ప్రముఖ పుస్తక విక్రయ కేంద్రాల్లో (విశాలాంధ్ర, నవోదయ, తెలుగు బుక్ హౌస్, ప్రజాశక్తి, దిశపుస్తక కేంద్రం, సాహిత్యభారతి వగైరా) దొరుకుతుంది. ఆన్‌లైన్ లో కినిగె.కాం ద్వారా పొందవచ్చు. http://kinige.com/kbook.php?id=1813)

గమనిక:

మీ మీ  ప్రాంతాలలో జరగబోతున్న సాహిత్య సభల గురించి వారం రోజుల ముందు మాకు పంపండి. ఇక్కడ ప్రచురిస్తాం.