డా. కోగంటి విజయ బాబు
బాల్కనీ లోవూయల!
తన ఉనికి,అస్తిత్వం తెలుసుకోకుండానే,
వంటరిగా!
ఎదురుగా నిండుగా పూచిన వేప చెట్టుని,
రోడ్డుపై ఆడే పిల్లల్ని,
ఎదురింటి మనుషుల్ని,
చూస్తూ కూడా చూడనట్లుగా
ఖాళీగా,గాలిలో,
గాలినిచూస్తున్నట్లున్న ఊయల!
నాలానే, నా మనసు లానే
అన్నిటిని మోస్తూ, ఊగుతూ
కానీ వంటరిగా,
మనసులేని,మనసంటే తెలియని వూయల!
దానికి ఇంద్ర ధనువు,ఎండ వేడీ ఒకటే!
కొందరి మనుషుల్లా
చూరును పట్టి వ్రేలాడే గొలుసుకు తగిలింపబడి ఉండటమే దానికితెలుసు.
అపుడపుడూ నావైపుతిరిగి,
ఖాళీగా పిలుస్తున్నట్లుండే ఊయల!
కాలం గడుస్తుందని దానికి తెలుసో లేదో!
ఎవరినీ, ఏ భావాలనూ పట్టించుకోక
ఏభావమూ కాక, కాలేక
వంటరిగా!
అశరీరికి, మనసున్న వారికి
స్థిత ప్రజ్ఞత
కుదరదేమో!
ఆ అవసరమూ లేదేమో!
*
తాజా కామెంట్లు