స్లీమన్ జీవితధారావాహిక
కల్లూరి భాస్కరం
మనకు వాల్మీకి, వ్యాసుడు ఎలాగో పాశ్చాత్యులకు హోమర్ అలాగ!
మనం… కనీసం మనలో అనేకమందిమి… రామాయణ, మహాభారత కథలను వింటూ, చదువుతూ, చూస్తూ, నెమరువేసుకుంటూ పెరుగుతాం. వాటిలోని పాత్రలు మన కుటుంబసభ్యులంత దగ్గరైపోతాయి. మనమే కాదు, ప్రతి దేశమూ, ప్రతి జాతీ తనకు చెందిన పురాగాథల వారసత్వాన్ని ఉగ్గుపాలతోపాటు అందుకుంటూనే పెరుగుతుంది. పాశ్చాత్యుల విషయానికి వస్తే, ఇలియడ్, ఒడిస్సేలు వారి ‘రామాయణ, భారతా’లు.
సంగతేమిటంటే, జర్మనీలో పుట్టిన ఓ కుర్రాడికి అప్పుడప్పుడే ఊహ వికసిస్తున్న వయసులో వాళ్ళ నాన్న హోమర్ ను పరిచయం చేశాడు. అప్పటినుంచీ హోమర్ ఆ అబ్బాయి హృదయస్పందనలో భాగమైపోయాడు. ఆ తర్వాత అతను తన జీవితమంతా హోమర్ తోనూ; అతని ఇలియడ్, ఒడిస్సేలతోనూ సహజీవనం చేశాడు.
అతని పేరు హైన్ రిచ్ స్లీమన్!
ఇలియడ్ కథాస్థలి అయిన ట్రాయ్ లో, మైసీనియాలో తవ్వకాలు జరిపించి పురాచరిత్ర తాలూకు అద్భుత నిధి నిక్షేపాలను వెలికి తీసిన వ్యక్తిగా స్లీమన్(1822-1890) ప్రపంచప్రసిద్ధుడు. విచిత్రమైన మలుపులతో గొప్ప నాటకీయతను పండిస్తూ సాగిన అతని జీవితం కూడా అంతే అద్భుతం. ఆపైన అతని వ్యక్తిత్వంలోనూ, వృత్తిప్రవృత్తులలోనూ ఊహకందని వైరుధ్యాలు. అవన్నీ కలసి ఒక ఆసక్తికరమైన ఒక ‘టైపు’గా కూడా అతణ్ణి మనకు పరిచయం చేస్తాయి.
***
రెండేళ్లపాటు ధారావాహికంగా సాగి రెండు వారాలు విరామం తీసుకున్న ‘పురా’గమనం కాలమ్ లో ముందు అనుకున్న అజెండాను పూర్తి చేయకుండానే మధ్యలో ఈ స్లీమన్ ముచ్చటేమిటనుకుంటున్నారా? ఆ విషయానికే వస్తున్నాను. ఇప్పటికే మీకు అర్థమయ్యుంటుంది, ‘పురా’గమనం ఒక సుదీర్ఘయాత్ర. వ్యక్తిగత కారణాలు అడ్డు రాకపోతే ఇంకో రెండేళ్ళు… ఇంకా అంతకంటె ఎక్కువ కాలమే కొనసాగగలిగిన సరుకు అందులో ఉంది. అయితే ఇది ఎలాగూ సుదీర్ఘయాత్ర కనుక స్లీమన్ అనే మజిలీ దగ్గర కొన్ని వారాలు ఆగితే ఎలా ఉంటుంది?!
***
స్లీమన్ జీవితగాథ ‘పురా’గమనం శీర్షికలో ఒదిగిపోతుందన్న నమ్మకం కూడా ఈ కోరికకు ఒక కారణం. ఒక పక్క హోమర్ ను వింటూ, ఇంకో పక్క తన ఊళ్ళోని చారిత్రక శిథిలాల మధ్య తిరుగుతూ, వాటి గురించిన అద్భుతత్వ కథనాలకు ఆసక్తిగా చెవి యొగ్గుతూ బాల్యాన్ని గడిపాడు స్లీమన్. ఇలియడ్, ఒడిస్సే లను కేవలం పురాణంగానో, ఇతిహాసంగానో కాకుండా; చరిత్రగా భావించుకోవడం ప్రారంభించాడు. ఆ చరిత్రను తవ్వి తీయాలని కలలు కన్నాడు. చివరికి ఆ కలల్ని నిజం చేసి ప్రపంచాన్ని ఆశ్చర్యచకితం చేశాడు.
రామాయణ, మహాభారతాలలో పేర్కొన్న ప్రదేశాలలో తవ్వకాలు జరిపించి; వాటిలోని పాత్రలు ఉపయోగించిన ఆయుధాలు, ధరించిన నగానట్రా వగైరాలను వెలికి తీసినప్పుడూ; నేటి భౌగోళిక పటం పై ఆ ప్రదేశాలను గుర్తించినప్పుడూ అది మనకు ఎంత అద్భుతంగా తోస్తుంది? స్లీమన్ అలాంటి అద్భుతత్వాన్నే అనుభవించాడు. ఇతరులను అనుభవింపజేశాడు.
“గతం తాలూకు అవశేషాలను తవ్వి తీయడాన్ని మించి మన జీవితాలలో సంతోషాన్ని నింపగలిగింది మరొకటి లే” దంటాడు స్లీమన్. ఇలా అనడం విపరీతంగా ధ్వనించే మాట నిజమే. అయితే అతని జీవితగాథలోకి వెడుతున్న కొద్దీ ఈ మాట పురాచరిత్రతో అతని తాదాత్మ్యాన్ని చెబుతుంది. ప్రపంచాన్ని విప్పారిన కళ్ళతో ఒక అద్భుతంగా దర్శించే ఒక పసిమనసునూ బయటపెడుతుంది.
అలాంటి పసిమనసు కలిగిన వారందరినీ అతని జీవితగాథ ఆకట్టుకుంటుంది!
***
THE GOLD OF TROY పేరుతో ROBERT PAYNE చేసిన రచనే ఆ విశ్వాసానికి ప్రేరణ. ఆ రచన ఆధారంగా చెప్పబోయే స్లీమన్ జీవితగాథతో అతిత్వరలోనే ‘పురా’గమనం తిరిగి కొనసాగుతుంది…
ఆసక్తి కరం గా వుంది..
తప్పక ఎదురు చూస్తామ్ పు (న) రాగమనం కోసం
పురాగమనం…పు(న)రాగమనం…బాగుంది. థాంక్స్ జయశ్రీగారూ…