ఆమె కవిత రాస్తే కొరడా పడ్డట్టే!

subham

పాతికేళ్ళ  శుభమ్ శ్రీ జవహర్‌లాల్ నెహ్రూ విశ్వవిద్యాలయంలో పరిశోధక విద్యార్థిని.శుభమ్ శ్రీ యెప్పుడు రాసిన చర్చనీయాంశమే.ఆమె  బుఖార్(జ్వరం) ,బ్రేక్ అప్ ఐ లవ్ యూ కవితలు రాసినపుడు కూడా చాలా చర్చలు, విముఖతలు,సుముఖతలెన్నో విన్పించాయి.యీమెకు హిందీ కవిత్వానికిచ్చే ప్రతిష్టాత్మకమైన భరత్ భూషణ్  అగ్రవాల్ పరస్కారం 2016 వ సంవత్సరానికి గానూ లభించింది. హిందీ సాహిత్యప్రపంచం జీర్ణించుకోలేక పోయింది.జ్యూరీ సభ్యులలో వొకరైన వుదయ్ ప్రకాష్ మాత్రం సరైన యెంపికేనని కొత్త వొరవడిని ఆహ్వానించాలని చెప్పారు.

సాంప్రదాయ శిల్పపు నడుములను విరచి ముక్కలుగా చేసి రాస్తున్నప్పుడంతా యిలాంటి చర్చలు జరగడం సహజమే అన్పిస్తోంది.

శుభం శ్రీ యీ కవితలో నెరేటివ్ వ్యాఖ్యానపు వుత్తరాధునిక శిల్పమైన పెరడి గొప్పగా కనిపిస్తుంది.కవిత్వపు జడత్వాన్ని విదిలించే వొక కావ్యాత్మక ప్రయత్నాన్నీ తిరస్కరించే కంటే దానిని అర్థం చేసుకొనే దృష్టిని అలవరచుకోవాలి. యీ కవితలో కవిత్వం రాయడం వొక వ్యాపారంగా,వొక కెరీర్గా భావించే వారిపై తిరుగుబాటు కనిపిస్తుంది.సోషల్ మీడియాపై వొక గర్జన, యింకా వామపక్ష భావజాలం, స్త్రీ పట్ల మగవాడి పెత్తందారి ప్రవర్తన,రాడికల్ స్త్రీవాద చర్చలు యీమె కవిత్వంలో అంతర్లీనంగా వుంటాయి.యిది మౌఖిక కవిత యిందులో కవిత్వాన్ని యెలాంటి ఫలాలు యివ్వని చర్యగా,ప్రపంచ వ్యాప్తంగా యే వుద్దేశ్యాలను పూరించలేక పోతుందని వాపోవడం కనిపిస్తోంది.

పొయెట్రీ మేనేజ్మెంట్
—————————

కవిత్వం రాయడం బోగస్!
అరే,పనికిరాని పని
మొత్తంగా….
పనిపాటలేని పని!
పార్ట్ టైం!

మావాఁ,యేదో నెమరేసినట్టు
యెంబియే సేమ్ బియే టైపు అన్పిస్తోంది
గుజ్జు వచ్చేస్తోంది గురూ!

యిటు వొక కవిత రాసారనుకో;
సెన్సెక్స్ పడిపోతుంది
కవి లింగరాజు వొక కవిత రాసారు
పెట్టుబడివాదాన్ని వ్యతిరేకిస్తూ
సెన్సెక్స్ పడిపోయింది
ఛానల్ లో చర్చ
యిది వొక నమూన
అమెరికా సామ్రాజ్యవాదం పడిపోయిందని
వెనిజులతో ప్రేరేపింపబడిన కవులను
అమెరికా నియంత్రించగలదా?
ఆర్థికమంత్రి వుపన్యాసంలో
చిన్న యిన్వెష్టర్లకు నమ్మకం లభిస్తుంది
ఆర్బీఐ వెంటనే రెపోరేటును పెంచేస్తుంది
మీడియాలో గందరగోళం
సమకాలీన కవిత్వం
వొక సంకలనంగా ప్రచురింపబడుతోంది
వొక సామాన్యుడు యీ కవితాసంకలనాన్ని
యెలా యెదుర్కుంటాడో ?దీని గురించి
మీరే చెప్పండి
మీ స్పందనలు మాకు యెస్యంమెస్ చేయండి

అరే, సీ పీ వో (చీఫ్ పొయెట్రీ ఆఫీసర్)పేరు
ఆకాశంలో మెరుస్తుంటుంది
యాడ్లు ప్రతి కార్యక్రమంలో చూపిస్తుంటారు
రిలయన్స్ డిజిటల్ కవిత
లైఫ్ ను యిచ్చును
టాటా కవిత
ప్రతి పదం మీ కోసమే
ప్రజలు తమ డ్రాయింగు రూముల్లో
వేలాడదీస్తారు
అరే, వావ్ భలే వుందే! అని
యే అకాడమీ వాడికో అనిపిస్తుంది
లేదండీ, యింపోర్టెడ్
అసలైనది కోట్ల డాలర్లది
మేము డూప్లికేటు కొనుక్కున్నాం
పిల్లలు వ్యాసాలు రాస్తారు
నేను యం పీ యే చదువుతానని
యలైసీ పొయెట్రీ యిన్సురెన్స్
మీ కల కూడా మాదే
డియూ, పొయెట్రీ ఆనర్సు, ఆకాశంలో
కట్ ఆఫ్ ప్యాట్ (పొయెట్రీ ఆప్టిట్యూడ్ టెస్టు)
పరీక్షలో మళ్ళీ అమ్మాయిలే సత్తా చాటారు
ప్యాట్ రిజర్వేషన్లలో జరిగిన అవినీతికి
వ్యతిరేకంగా జరిగిన ధర్నాలో
వి.సీ.దిష్టిబొమ్మ దహనం చేయబడుతుంది
దేశంలో యెనిమిది కొత్త కవితాసంస్థల
స్థాపనకు ఆమోదముద్ర లభిస్తుంది

మూడేళ్ళ వయసుకే
మూడువేల కవితలు వల్లెవేస్తుంది
భారతదేశపు పసిఅధ్భుతం
అమెరికా యిరాన్ ప్రవృత్తితో దిగులు పడి
ఫారసీ కవితాసాంప్రదాయాన్ని వోడిస్తుంది.

యిది ఆల్ యిండియా రేడియో
వార్తలు చదువుతున్నది దేవానంద రావు
నమస్కారం
యీ రోజు ప్రధానమంత్రి అంతర్జాతీయ
కావ్యసమ్మేళనంలో పాల్గొనేందుకు
మూడురోజుల పర్యటన కోసం బయలుదేరారు
యిందులో కవితాగుంపుల నుంచి
ప్రతినిధులుగా పాల్గొంటున్నారు.
భారతదేశం యెలాంటి పరిస్థితులలోనూ
తన విధానాన్ని మార్చుకోదని స్పష్టం చేసింది
భారత్ – పాకిస్తాన్ ల కవితా దైపాక్షిక చర్చలు మళ్ళీ విఫలం.
పాకిస్తాన్‌ యిక్బాల్,మంటో, ఫైజ్ ల
వ్యాజ్యాన్ని వెనక్కు తీసుకోమటోంది

చైనా నేడు మళ్ళీ కొత్త కావ్యాలంకారాలను పరీక్షించింది
యిప్పుడు అతిశక్తివంతమైన కావ్యసంపుటాలను
సృష్టిస్తుందనే కథనాలు విన్పిస్తున్నాయి
యీ రోజు వుదయాన్నే ప్రముఖ కావ్యనిర్మాత ఆషిక్ ఆవారా ప్రాణాలొదిలారు
వారి అకాల మరణానికి రాష్ట్రపతి సంతాపం ప్రకటించారు
వుత్తరప్రదేశ్ లో మళ్లీ దళితులపై దాడి
అటు క్రీడల్లో భారత్ వరుసగా మూడోసారి
కవిత అంతాక్షరిలో పసిడిపతాకాన్ని సాధించింది
భారత్ వరుస సెట్లలో 6 -4, 6-4, 7-2 తో
మ్యాచ్ ను గెల్చుకుంది
వార్తలు సమాప్తం

వచ్చేసింది నేడే హిందూ,హిందుస్తాన్ టైమ్స్, యీనాటి పత్రిక, ఆంధ్రనాడు
తెలంగాణ జ్యోతి
యువకుల్లోకి ప్రవేశించిన పొయెట్ హేర్ స్టైల్ జ్వరం
కవయిత్రులు తమ కురచైన,పొడవైన
అచ్చుల రహస్యాలను పంచుకున్నారు
ముప్పై యేళ్ళ యెం పీ యే అబ్బాయికీ
సంస్కార,సాంప్రదాయబద్ధమైన వధువు కావాలి
యిరవై ఐదు సంవత్సరాల యెం పీ యే చేసిన
సన్నని పొడవైన వధువు కోసం యోగమైన
వరుడు సంప్రదించగలరు

గురూ! తమాషాగా వుందే
మాట్లాడుతూనే వుండూ
నేనూ హీరో అవుతాను
యెక్కడికెళితే అక్కడ ఆటోగ్రాఫ్ లు
యిస్తూనే వుంటాను
చాల్లే రా
థార్డ్ డివిజనులో యెం .యే
యెం పీ యే ఫీజు యెవరిస్తారు?
కూర్చోని ప్రూఫ్ రుద్దూ.

*

మీ మాటలు

  1. Suparna mahi says:

    అన్నయ్యా…. నిజంగా భిన్నమైన ఆలోచనా సరళినితివృత్తంగా, వ్యంగ్యమేమో అనే భావననీ కలగనీయకుండా చక్కని గొప్ప అనువాదంగా అందించారు… ధన్యవాదాలు & రచయితకు అభినందనలు…

  2. Vilasagaram Ravinder says:

    ఖాన్ జి బాగుంది అనువాదం , కవిత .

  3. నెమలిదిన్నె రమణారెడ్డి says:

    వైవిధ్యత ఉన్న కవిత ఇది !పఠాన్ గారికి,శుభమ్ శ్రీ గారికిఅభినందనలు.

  4. గుడ్ పొయెమ్ తాంక్యూ మస్తాన్ గారు.

  5. పఠాన్ మస్తాన్ ఖాన్ says:

    మీ స్పందనలకు ధన్యవాదాలండీ

Leave a Reply to bollojubaba Cancel reply

*