సినిమా తీయిస్త మావా..!

 

 

                                                       -బమ్మిడి జగదీశ్వరరావు

వుడ్ బీ ప్రొడ్యూసర్ కి!

ఒరే మావా..

వుడ్ బీ అంటే కాబోయే అని మాత్రమే అనుకోనేవు! వుడ్ అంటే టాలీవుడ్, కోలీవుడ్, బాలీవుడ్, హాలీవుడ్ లాగే.. ‘వుడ్’ అంటే చెక్క.. అలాగే ‘బీ’ ఫర్ భజన! టోటల్లీ చెక్క భజన! చెక్క భజన చేస్తూనే వుండాలి.. జీవితాంతమూ.. తల్లివి నీవే-తండ్రివి నీవే- చల్లగ మము కరుణించే దైవము నీవే- అని కీర్తించాలి.. నీ అంతటోడు లేడు.. నువ్వు హీరో కావడం మా పూర్వజన్మ సుకృతం.. బాబుగారు సహకరించడం వల్లే సినిమా పూర్తయింది.. బాబుగారు డేట్స్ యివ్వడం వల్లే జన్మ ధన్యమయ్యింది.. బాబుగారి సలహాల వల్లే సినిమా (ఫట్టయినా) హిట్టయింది.. ఆబాబుకు వంశముంటే ఆ వంశాన్ని కూడా అని నిత్యమూ నిరంతరమూ సోపెయ్యాలి! టిష్యూ పేపరు అవసరం లేకుండా సాంతం నాకెయ్యాలి.. యిదే మొదటి సక్సెస్ మంత్రం! యిదే గాయత్రీ మంత్రం!

ఓం ప్రధమం సినిమాకి కావలసింది కథ కాదు! పేకేజీ కావాలి! విడిపోయిన రెండు తెలుగు రాష్ట్రాలకు ప్రత్యేక పేకేజీ యెంత అవసరమో- అంతకన్నా యెక్కువ అవసరమీ పేకేజీ! వొక హీరో.. వొకరో యిద్దరో ముగ్గురో నలుగురో బొంబాయి హీరోయిన్లూ.. హిందీ విలన్లూ.. మార్కెట్లో ఆరోజుకి హిట్టు కొట్టిన డైరెక్టరూ.. సాంకేతిక నిపుణులూ.. కామ్బినేషన్లన్నీ కలిపిన దాన్ని పేకేజీ అందురు! కథ లేకపోయినా- అది కథ కాకపోయినా- కథ ఫారిన్లో మొదలవ్వాలి.. ఇంటికి అంటే ఇండియాకి రావాలి! ఫారిన్ లోకేషన్లతోనే రిచ్ నెస్ తేవాలి! హీరోయిన్ల అందాల ఆరబోతే కావాలి! పాటలు అదిరిపోవాలి! ఫైట్లుకు బెదిరిపోవాలి! సంచులకొద్దీ పంచులు వుండాలి! వ్యాంపు సాంగ్ మస్ట్! కామిడీ కంపలసరీ.. సరేసరి!

ఇక సినిమా తియ్యాలంటే మనజేబులో డబ్బులు ఖర్చుపెట్టుట మహానేరము! పక్కవాడి జేబు పరమ వుపయోగమూ పరమపద సోపానమూ! పక్కవాడి జేబునే ఫైనాన్సు అందురు! సినిమా అనిన జూదము! జూదములో మన ఆస్తులు పోగొట్టుకొనుట తెలివి తక్కువతనము! పక్కవాడి ఆస్తులు పెట్టి మనము తాకట్టువుండుట గుడ్డిలో మెల్ల అగును!

మేకింగ్ కాస్టులో మేజర్ బడ్జెట్ అంటే సగం బడ్జెట్ హీరోకూ- మరో సగం డైరెక్టరూ హీరోయిన్లూ మిగతా ఆర్టిస్టులూ పోనూ.. ప్రొడక్షనూ పోస్ట్ ప్రొడక్షనూ పోనూ.. మన ఖర్చులు పోనూ- మన ఖర్చులు అంటే పార్టీలూ స్పాన్సరింగులూ కామన్.. పీఆర్ పెంచుకోవాలి కదా.. మన యింట్లోకి కాలసిన బియ్యమూ పప్పులూ వుప్పులే కాదు, కుర్చీలూ కంప్యూటర్లూ దాక అటు చూపించి యిటు మల్లించుటన్న మాట- చిన్నా చితకా ఆర్టిస్టులకు టెక్నీషియన్లకూ కాస్తంత ఎగ్గొట్టి- పైకి రావాల్సివుంటుంది!

నా అనుభవాలే నీకు చెప్పగలను.. నేను చూసినవి చెప్పగలను.. చాలామంది సినిమా మా ఫేషన్ అని, అందుకే ఈ రంగానికి వచ్చామని చెపుతుంటారు! సినిమావాళ్ళ మాటలు నమ్మొద్దు అనేది ఇక్కడా వర్తిస్తుంది! ఎందుకంటే యెక్కువమంది అమ్మాయిల కోసం వస్తారు! ఎంజోయ్ చెయ్యాలని వస్తారు! డబ్బు వున్నప్పుడు అన్నీ.. యెన్నోకొన్నీ సాధ్యమే! అయితే అందుకోసమే వస్తే వచ్చిన కంటే వేగంగా వెళ్ళిపోవడమూ నిజమే! రియలెస్టేట్ లాంటి వేరే వ్యాపారాలు వున్నవాళ్ళు సీజనల్ గా వస్తారు.. ఇండస్ట్రీకి బాకీ వున్నట్టు డబ్బు చెల్లించేసి వెళ్ళిపోతారు! ఆల్రెడీ యిండస్ట్రీలో వున్నోళ్ళు కొత్తవాళ్ళని ముంచేస్తారు.. మళ్ళీ తేలడం వుండదు.. అలాగే యిన్నాళ్ళు శాటిలైట్ వుండేది.. వూపిరి ఆడేది.. యిప్పుడు అదీలేదు.. పెద్దహీరోల సినిమాలే టీవీల వాళ్ళు కొనడం లేదు! దానికి కూడా వో హిట్టు సినిమాతో కలిపి అంటగడితే కాని అమ్ముడుపోవడం లేదు.. శాటిలైట్ వున్నప్పుడు తెగ చిన్నా చితకా చెత్తా చెదారం సినిమాలు వొచ్చేవి.. పెరుగుట విరుగుట కొరకే అయిపొయింది.. అయినా సినిమాకి జీవితానికి సంబంధం లేదు.. అలాంటప్పుడు సినిమాలు యెందుకు చూస్తారు చెప్పు..? అన్నీ నెగటివ్ పాయింట్స్ చెపుతున్నానుకోకు.. నెగటివ్ పాయింట్స్ అన్నీ ఫ్యూచర్లో నీకు పాజిటివ్ పాయింట్స్ అవుతాయి! అవ్వాలి!

నువ్వు ప్రొడ్యూసర్ కావడం నాకేదో పోటీ అని నేను నీకివన్నీ చెప్పడం లేదు.. అలా అయితే ఫిలింసిటీ వుండి- ఉషాకిరణ్ బేనర్ మీద సినిమాలు తీసిన రామోజీరావు మునిపటిలా సినిమాలు యెందుకు తీయడంలేదు? సురేష్ ప్రొడక్షన్స్ వాళ్లకి హీరో వుండి స్టూడియో వుండి మునిపటిలా సినిమాలు యెందుకు తీయడంలేదు? రిలయన్సు లాంటి కార్పొరేట్ సంస్థలు వొచ్చినవి వొచ్చినట్టే యెందుకు వెనక్కి వెళ్ళిపోయాయి?

మాతో హిట్టులు కొట్టిన హీరోలే మాకు డేట్లు యివ్వడం లేదు! ఒక్క ఫ్లాప్ కొడితే మనమెలా డైరెక్టర్ ముఖం చూడమో.. మనమొక ప్లాప్ యిస్తే హీరోలూ మన ముఖం చూడరు.. తరువాత చెప్పలేదని నన్ను నిందిస్తే కుదర్దు.. అందుకే అన్నీ ముందే చెప్పేస్తున్నా..

అప్పటికీ తెలుగు సినిమాని కాపాడుకోవడానికి తెలివైన మేధావులమంతా యెప్పటికప్పుడు వొక్కచోట చేరుతూనే వున్నాం! మీటింగులు పెట్టి మాట్లాడుతూనే వున్నాం! ఆ అనుభవాలు కూడా నీకు తెలియజేస్తున్నాను..

ఏడాదికి నూటరవై స్ట్రెయిట్- డబ్బింగో నలభై- మొత్తం రెండువందల సినిమాలు తీస్తే నాలుగు నుండి ఆరు సినిమాలే ఆడుతున్నాయని, మిగతా నూట తొంభైయ్యారు సినిమాల నిర్మాతలు నెత్తిమీద తడిగుడ్డ వేసుకోవాల్సిందేనని చాలామంది నిర్మాతలు వాపోయారు! చిన్న నిర్మాతల చింతయితే యింతా అంతా కాదు!

నిర్మాతల బాధలు పగవాడికి కూడా రాకూడదు గాక రాకూడదు! మొన్న నిర్మాతల సంఘం మీటింగులో పైరసీ అన్నారొకరు. థియేటర్లు దొరకడం లేదు అన్నారింకొకరు. దొరికినా జనం రావడం లేదన్నారు మరొకరు. టీవీలకి జనం బాగా అలవాటు పడిపోయారన్నారు యింకొకరు. మరేం.. సినిమా రిలీజయినప్పుడు చూడకుండా టీవీలో వొచ్చినప్పుడు తెగ చూసేసి రేటింగ్ పెంచేస్తున్నారు అన్నారు వొకరు. అందుకే డైరెక్ట్ గా టీవీల్లో రిలీజ్ చేయండి.. జనం సినిమాలకు రావడం లేదని, థియేటర్లు దొరకడం లేదని ప్రోబ్లమే వుండదని కమలహాసన్ చెప్పలేదా? గుర్తుచేశారు యింకొకరు!

అందుకే వారానికి వొకట్రెండు సినిమాలే రిలీజు చేసి.. మరో సినిమా చూసే అవకాశం లేకుండా.. ఛాన్సు యివ్వకుండా.. అన్ని థియేటర్లలో ఆడించేస్తే జనం చచ్చినట్టు చూస్తారని.. వారంలో రెవెన్యూ గోడకు కొట్టిన బంతిలా వెనక్కి వొచ్చేస్తుందని ప్లాన్ చేశాం.. అదీ పూర్తిగా వర్క్అవుట్ కాలేదని ఈసురోమంటుంటే- మీ పెద్ద సినిమాలు ఎంచక్కా వారానికి వొకటే.. ఎటొచ్చీ మా చిన్న సినిమాలే వారానికి ఏడు రోజుల్లాగ ఏడు సినిమాలేసి కలక్షన్లు కాదుకదా కనీసం రివ్యూ కూడా రావడం లేదని- పానకంలో పుడకలా చిన్న సినిమాల నిర్మాతలు లబో దిబో మన్నారు! మాది గానుగే పోయింది.. మీదెంత?, గానుగులోది గిద్దెడు- అని పెద్ద నిర్మాతలు పెడబొబ్బలు పెట్టారు!

ఎండలు కదా అని చల్లార్చబోయాడో మేథోనిర్మాత! కుర్రాళ్ళకి పరీక్షలు కాదా చెప్పాడో మేధావి! ఉపశమనం లేకపోగా వుస్సురు మన్నారు మన నిర్మాతలు! ప్రొడక్టివ్ ఖర్చు.. బడ్జెట్ తగ్గించుకుంటే జెట్ లా సినిమాలు దూసుకుపోతాయి అన్నాడు మరో మేథోనిర్మాత! ఆ  మేథావే స్టార్ హీరోకు మార్కెట్ రేటుకన్నా మరో రెండు కోట్లు యెక్కువిచ్చి డేట్స్ సొంతం చేసుకున్నాడు! తెలంగాణ సర్కార్ ఈమధ్య ఐదు ఆటలకు అవకాశం కల్పించినా అదీ వేస్టేనని యేమంత కలిసోచ్చేది కాదని కూడా మా నిర్మాతలు అనుకున్నారు!

అయినా రిస్కున్నప్పుడే కదా గ్రోతు?

ఎవరి అనుభవాలు వాళ్ళవి! నేను బయటకు వస్తుంటే నువ్వు లోపలకు వెళ్తానంటున్నావ్! వెళ్లి రా..! క్షేమంగా వెళ్ళి లాభంగా రా..! సినిమా యిండస్ట్రీ వొక పుష్పక విమానం.. తలుపులు యెప్పుడూ తెరచియే వుండును! నే వెంట్రుకంతే చెప్పాను.. జడంత మడంత నీకు నువ్వు అనుభవమ్మీద తెలుసుకోవలసి వుంటుంది! ఈతకు దిగేవాడికి లోతు గురించి చెప్పకూడదంటారు.. చెప్పి నేను తప్పు చేసానేమో..!?

నీకిదే స్వాగతం.. రా..

నీ

మావ

(ఆల్రెడీ ప్రొడ్యుసర్)

మీ మాటలు

  1. Buchireddy gangula says:

    As .usual .చక్కగా చెప్పారు
    నేటి. సినిమా ల కు కథ. తో. పని లేదు
    నాలుగు పంచ dilaagulu ..3 హెరాయిన్ లు -డబల్..మీనింగ్. పాటలు —
    ఫైటింగ్ లు—3లెక 4 గురు కమెడియన్ లు–సొల్లు జోక్ లతో —

    చిరు 150..వ. Cinema రోజు. పేజి three news …???
    కోట్ల కొద్ది. ఖర్చులతో —-
    ———-_—————-
    Buchi రెడ్డి. గంగుల

  2. Kalidasu says:

    Age bar heros or their sons and relatives.

  3. చందు తులసి says:

    నిజమే సార్…..
    తెలుగు సినిమాకు ఇపుడు నిర్మాత…..అవసరం లేదు. క్యాషియర్ మాత్రం చాలు.

  4. Delhi Subrahmanyam says:

    మా గొప్పగా సేప్పెసినావ్ బావ్

మీ మాటలు

*