శ్రీపతి, బి-22 రవీంద్రనగర్, హబ్సిగూడా, హైద్రాబాదు – 500 007
డిసెంబర్ 30, 1988
ప్రియమైన త్రిపుర గారూ,
నమస్కారం. కొత్త సంవత్సరం కధా కాంక్షలు !
ఈ మధ్య కధలు చదువుతున్నాను. కొంత వరకు వరదరాజేశ్వర రావు గారు కారణం.
మార్తాండం ( శ్రీనివాస్ రాయప్రోలు ) పెంగ్విన్ వాళ్లకు కధలు అనువాదం చేస్తున్నాడు.
మీకు నచ్చిన కొన్ని కధలు ఇవ్వండి అని పని అప్పజెప్పారు. దాంతో కధా సంపుటాలన్నీ తిరగేసినప్పుడు మిత్రులు అత్తలూరి ఇచ్చిన ‘త్రిపుర కధలు’ చదవటం – మరోసారి జరిగింది.
అట్లాంటి కధలు చదివినప్పుడల్లా, ఆ రచనల్లోని సృజనాత్మక కళాసౌందర్యం సముద్ర ప్రమాణంలో ప్రత్యక్షమై ఆ సంతోషంతో తన్మయులం అయిపోతాము. నాకు దొరికిన కొద్ది కధలు ఆయనకు అందజేశాను. వాటిలో మీ ‘జర్కన్’ కధ ఆయనకు నచ్చి దాన్ని అనువాదం చేసారు. ఆ సందర్భంగా మీ వివరాలు తెలుసుకుని ఎంతో ఆసక్తి చూపించారు.
త్రిపుర, అజంతా, రాయప్రోలు శ్రీనివాస్ – ఒక కోవ కళాకారులనిపించింది. వారం దినాల క్రితమే అజంతా దర్శనం అయిందిక్కడ. ఈ సరికి ఆయన విశాఖ లోనే ఉండాలి.
నా వరకు కధా రచన కొనసాగింపు మొదలయినట్టే అనిపిస్తోంది. ఢిల్లీ నేపధ్యంలో ఓ చిన్న నవల ప్రస్తుతం మెల్లగా సాగుతోంది. నాలుగైదు కధలు – తిప్పి రాసి – పత్రికలకు ఇవ్వాలనుకుంటున్నాను. పాత కధలు పునర్ముద్రిస్తుంటే సిగ్గొచ్చి కొత్త కధలు రాయాలనిపిస్తోంది.
మీ ఆరోగ్యం బాగుందా? జవాబు రాస్తే సంతోషం.
మీ
శ్రీపతి
విప్లవ రచయితల సంఘం (విరసం) వ్యవస్థాపక కార్యవర్గ సభ్యుడు, ప్రముఖ కధకుడు శ్రీపతి గారు (పుల్లట చలపతి రావు) మేధావి రచయిత త్రిపుర ( రాయసం వేంకట త్రిపురాంతకేశ్వర రావు ) గారికి 1988 వ సంవత్సరంలో రాసిన యీ ఉత్తరం యీ వారం సారంగ లేఖాయణం లో చూడటం చాలా ఆనందానిచ్చింది.
త్రిపురను డిస్కవర్ చేసి తెలుగు పాఠకకోకానికి పరిచయం చేసిన డా. అత్తలూరి నరసింహ రావు గారి ప్రస్థావన;
నవ్య కవితా పితామహునిగా పేరుపొందిన రాయప్రోలు సుబ్బారావు గారి తనయుడు రాయప్రోలు శ్రీనివాస్ ( మార్తాండం కలం పేరుతో కవిత్వం రాసిన ) గారి ప్రస్థావన; పేర్గాంచిన త్రిపుర జర్కన్ కధ ఆంగ్లంలోకి అనువదించబడటం గురించిన ప్రస్థావన; కవనకుతూహలం అబ్బూరి వరదరాజేశ్వర రావు, కేంద్ర సాహిత్య అకాడమి పురస్కారం పొందిన స్వప్నలిపి కవితాసంకలనం కవి అజంతాల ప్రస్థావనల తో కూడిన ఓ అపురూపమైనదీ యీ ఉత్తరం.