సురేష్ వంగూరి
ఖదీర్ బాబు ‘మెట్రో కథలు‘ చదివినవాళ్ళకి అనివార్యంగా రెండు విషయాలు అర్ధమవుతాయి.1. మెట్రో బతుకుల్లోని helplessness 2. మెట్రో వ్యవస్థలోని ugliness.
ఒకసారి మెట్రో చట్రంలో చిక్కుకున్నాక, వేరే ప్రత్యామ్నాయం లేక బలవంతంగా బతకటం తప్ప మరేమీ చేయలేని నిస్సహాయతను మనకు అవగతం చేసే ప్రయత్నమే ఖదీర్ బాబు ‘మెట్రో కథలు.‘
* * *
భార్యాభర్తల మధ్య ‘డిస్టెన్స్’ పెరగటానికి నగరంలో ఒక ప్రాంతానికీ మరో ప్రాంతానికీ మధ్య ఉండే డిస్టెన్స్ కూడా ఒకబలమైన కారణం. ఆర్ధిక ఇబ్బందుల వల్ల, తప్పని సరై, కొన్ని వదిలించుకోవాల్సి వస్తుంది. అది ఇష్టంగా పెంచుకున్న,మనసుకు పెనవేసుకుపోయిన గారాల కుక్క ‘సుకీ‘ అయినా సరే. ఆ గిల్టీ ఫీలింగ్ జీవితకాలం వెంటాడినా సరే,తప్పదు. భర్త స్పర్శకు నోచుకోని భార్యలకు, మసాజ్ గురించి ఏమీ తెలీని ‘దీదీ‘ల అవసరం చాలా ఉంది. భార్యాభర్తల మధ్య యాంత్రికతనూ దాని పర్యవసానాల్నీ ‘సెల్ఫీ’ కథ హెచ్చరిస్తుంది. మహానగరంలో బైటికొస్తే ఆడవాళ్ళ టాయిలెట్సమస్య ఎంత హృదయవిదారకమో ‘షీ‘ కథ కళ్ళకు కట్టినట్టు వివరిస్తుంది. ఒక మహిళా ఉద్యోగి దైనందిన జీవితంలోనిసంఘర్షణల్ని, వాటితో పాటు పేరుకుపోతున్న అసంతృప్తినీ ‘నిద్రా సమయం‘, ‘రొటీన్‘ కథల్లో చెబితే, ఇరుకుఅపార్ట్మెంట్లో ‘అమ్మమ్మ‘ పరిస్థితి ఎంత దుర్భరమో చూపిస్తాడు.
ఖదీర్ బాబు మెత్తగా, ఆర్ద్రతగా కథ చెబుతూనే, మధ్యలో అక్కడక్కడ మనసుని మెలిపెట్టే వాక్యాలు సంధిస్తాడు.కథకు అవి ప్రాణం. పాఠకునికి అవి పాఠం. మచ్చుకు కొన్ని వాక్యాలు చూడండి…
జీవితంలో ఈ మాత్రం కష్టమైనా ఉన్నందుకు ఆమెకు అపుడప్పుడు సంతోషంగా ఉంటుంది (అమ్మమ్మ).
ఆ దప్పిక ప్రాణం తీస్తుందని ఎవరు చెప్పాలి… ఎలా చెప్పాలి? (దీదీ).
ఇక్కడికొచ్చాక భర్తే కాపాడాలి అనే భయం దాదాపు పోయింది (రొటీన్).
అయినా నిన్ను పొందాలంటే నేనేమైనా కోల్పోవాలా? (సెల్ఫీ).
వేళ్ళు మాత్రమే పని చేస్తూ మిగిలిన శరీరమంతా పారలైజ్ అయ్యే వ్యవస్థ ఏదో మనల్ని బిగిస్తోంది (ప్రొఫైల్ పిక్చర్).
* * *
సెల్ఫీ… షీ… డిస్టెన్స్… ఈ మూడూ నా దృష్టిలో అచ్చమైన ‘మెట్రో కథలు.’
మెట్రో వ్యవస్థ వికృత రూపాన్ని దగ్గరగా చూసాడు కనుకే ఖదీర్ బాబు తన కథల్లో దాన్ని బట్టబయలు చేస్తున్నాడు. వ్యక్తుల్ని చూసి జాలిపడమనీ, వ్యవస్థ విషయం జాగ్రత్తపడమనీ చెబుతున్నాడు.
*
ఎవరికి వారు వారికే తెలియకుండా ఇరుక్కు పోయిన నయా జీవన స్రవంతి లోని … ఒంటరి తనంలోని ఆత్మ స్రావ గాయాల గమనం మెట్రో కథలు . ఇదీ ఒక సమస్యే నా అని ఎదుటవాళ్ళ కు అనిపించే చిన్న సమస్యలు ఎదురైన వాళ్లకు మాత్రం కనిపించే చాలా పెద్ద సమస్యలు . మీరు కథలో చెప్పే దాకా ఇవి సమస్యలు అని తెలియని కథలు మెట్రో కథలు అందరు చదవాల్సిన కథలు ఖదీర్ బాబుకు అభినందనలతో