నవ్వేటపుడు నవ్వకపోతే ఎట్లా
కన్నీళ్ళతోనే నవ్వుతాం
యాజ్జేసుకుంటాం పేగులు నలి నలి కాంగా
మడిసిపెట్టుకున్న కలలు
కొప్పున ముడుసుకునే పువ్వులైనంక
ఇంత దుఃఖం ఓర్సుకుని, ఇన్ని బాధలు మోసినంక
ఇగో యిప్పుడు ఆత్మగల్లసుట్టం వొచ్చినపుడన్న
మనసిప్పి నవ్వకపోతే ఎట్లా
అడివిల పొద్దీకినట్లు కాలం యెల్లబోసిన రోజులు పాయె
పొద్దు దర్వాజమీద పొడిసినంకగూడ
వాకిట్ల ముగ్గులెక్క నవ్వకపోతె ఎట్లా
చేన్ల పంటలెక్క మురవకపోతె ఎట్లా
పర్రెకాల్వల వూటలెక్క పొంగకపోతె ఎట్లా
ఎన్ని యాదికొస్తయి ఎంత దుఃఖమొస్తది
ఎవలెవలు కొత్తతొవ్వల్ల దీపాలెత్తి పోయిండ్రు
ఎవలెవలు కొత్తపాటల మునుంలేసి పోయిండ్రు
ఎవ్వరికోసం తమ పానాలుధారవోసి
కొత్తపాలధారలై మన కడుపునింపుతుండ్రు
అన్ని యాదికొస్తయి అందరు మతికొస్తరు
నవ్వబోతే వాళ్ళ ముకాలు గుర్తుకొస్తయి
నవ్వబోతే వాళ్ళ మాటలు యాదికొస్తయి
నవ్వబోతే వాళ్ళు లేకపోయిరనిపిస్తది
వాళ్ళందరు మన నవ్వులకోసమేకద
వాళ్ళ జిందగీలు మనకిచ్చిండ్రు
మనం నవ్వుకుంట వాళ్ళపేరన దీపాలు పెట్టుకుందాం
మనం నవ్వుకుంట కన్నీళ్ళను తుడుసుకుందాం
మనకు బతుకునిచ్చిన బతుకమ్మలెత్తుకుని
నవ్వులపండుగ చేసుకుందాం రండ్రి
చిత్ర రచన: ఏలే లక్ష్మణ్
బాగుంది, సర్,
ఎవలెవలు కొత్తతొవ్వల్ల దీపాలెత్తి పోయిండ్రు………నిజమే , అమరుల ఆత్మార్పణ తర్వాతనే తెలంగాణా పట్ల నిబద్దత పెరిగింది , అందరికి. మంచి వ్యక్తీకరణ .హరగోపాల్ గారు… అభినందనలు.
నిజమే మన సంతోషాన్ని పంచుకోకపోతే ఎట్లా కడుపునిండుగా హాయిగా నవ్వితేనే కదా మన ఆనందం తెలిసేది
బాగుందండి