ఎదురెదురుగా…

పూర్ణిమా సిరి

పూర్ణిమా సిరి

ఒకే దారిలో నడుస్తున్నాం
ఒకరికొకరం తారసపడాలంటే
ఎదురెదురుగా నడవాల్సిందే
ఎవరికి వారు ముందుకు సాగిపోవాల్సిందే..
కనపడిన దారిలోనే
కనుమరుగు కాకూడదనుకుంటే
ఒకే వైపుకు నడవాల్సిందే
దగ్గరి దూరాలనూ చవి చూడాల్సిందే
dc1d71e1661ed1922996aa8f5d364479
ఎప్పటికప్పుడు  పలకరించుకుంటూనే
పరిచయాలని పదిలపరుచుకుంటూ
అడుగుల్లో దూరాలను
లెక్కల్లో జీవితాలను
సరిచూసుకుంటూ
ఒకే రేఖకి రెండు చివర్లలా మిగిలిపోవాల్సిందే
ఎంతోకొంత దూరం వచ్చాక
మనం చేయగల్గిందల్లా ఒక్కటే
అపరిచితుల్లా విడిపోవడమో
ఆనందక్షణాలుగా మిగిలిపోవటమో
ఎదురెదురుగా కదలటమో
ఎటు కదిలినా యదలో నిలవటమో..
– పూర్ణిమా సిరి

మీ మాటలు

  1. టి. చంద్రశేఖర రెడ్డి says:

    పూర్ణిమ గారికి

    మీ కవిత చదివాను. రాస్తున్నవాళ్లు బరువు దించుకోవడానికి లేదా వాళ్ళు దించుకున్న బరువు చదివిన పాపానికి పాఠకుల నెత్తి మీద బరువుగా మారడానికి ఉపయోగపడటానికా అన్నట్లు ఇపుడొస్తున్నకవితల్తో పోలిస్తే మీ కవిత కొంచెం భిన్నంగా కొంచెం ఖిన్నంగా, కొండొకచో విషణ్ణంగా కూడా అనిపించింది. కాకపోతే రెండు అనుమానాలు. ఒకే వైపుకు నడవటం ఎదురెదురుగా నడవటం అవుతుందా. అలా నడిస్తే కలవటం సాధ్యం అవుతుందా. యద మీ దోషమా ముద్రారాక్షసమా. ఆ ఒక్క తప్పూ కవిత ఇచ్చిన కుండెడు పాల అనుభూతిలో విషపు చుక్క అయింది. అవునా.

    భవదీయుడు
    టి. చంద్రశేఖర రెడ్డి
    09866302404

  2. V.Ch.Veerabhadrudu says:

    మంచి కవిత పూర్నిమ గారు.

  3. జాన్ హైడ్ కనుమూరి says:

    చాలా రోజులతర్వాత ఆన్ లైను రాగానే మీ అక్షరాలూ చదివాను

    అభినందనలు

  4. జీవన సుదీర్ఘ యానంలో కలిసి విడిపోవడం విడి కలవడం రెండు తప్పనిసరి అయిన కాలం ఇది. కవిత సరళంగా లోతైన భావంతో హత్తుకుంది. అభినందనలు పుర్ణిమాజీ..

  5. Thirupalu says:

    బావుంది.

  6. erathisathyanarayana says:

    ఇది ఒక అనుభవం కావచ్చు ఒక observation కావచ్చు .సంబంధాల్లో ప్రకంపనలు .ఆ ప్రకంపనల ప్రతిధ్వనుల్లాగా కవితా పాదాలు.బావుంది.

    • Sharada Singireddy says:

      అపరిచితుల్లా విడిపోవడమో
      ఆనందక్షణాలుగా మిగిలిపోవటమో
      ఎదురెదురుగా కదలటమో
      ఎటు కదిలినా యదలో నిలవటమో

      ఎంతో సునాయాసంగా అంతే లోతుగా చక్కగా రాసారు

Leave a Reply to erathisathyanarayana Cancel reply

*